নাগৰিকত্ব (সংশোধন) আইনত গৃহীত হোৱাৰ পাছত আজি প্ৰথমবাৰৰ বাবে অসমত উপস্থিত হৈছে দেশৰ প্ৰধান মন্ত্ৰী নৰেন্দ্ৰ মোদী।
মোদীয়ে আজি বিটিএডিৰ কোকৰাঝাৰত বিশাল গণ সমাবেশত জনতাক সম্বোধি ভাষণ প্ৰদান কৰে।
উল্লেখযোগ্য যে, অসমত অব্যাহত থকা নাগৰিকত্ব (সংশোধন) আইন বিৰোধী ধাৰাবাহিক আন্দোলনৰ বাবে মোদীয়ে দুটাকৈ অসম ভ্ৰমণ বাতিল কৰিছিল।
কেন্দ্ৰ চৰকাৰে বড়ো উগ্ৰপন্থী গোট সমূহৰ সৈতে ঐতিহাসিক বড়ো চুক্তি স্বাক্ষৰ কৰাৰ পাছতে আজি কোকৰাঝাৰত অনুষ্ঠিত হোৱা বিশাল জনসভাত অংশগ্ৰহণ কৰে প্ৰধান মন্ত্ৰী গৰাকীয়ে।
জনসভাত ভাষণ প্ৰদান কৰি মোদীয়ে বড়ো চুক্তিয়ে বিটিএডিত স্থায়ী শান্তিৰ পথ প্ৰশস্ত কৰিলে বুলি উল্লেখ কৰে।
জনসভাত অংশগ্ৰহণ কৰি কোকৰাঝাৰৰ জনসভাক স্বাধীন ভাৰতৰ আটাইতকৈ বিশাল ৰাজনৈতিক সভা হ’ব বুলিও মোদীয়ে কয়।
আনহাতে, নতুন বড়ো চুক্তি অনুসৰি বিটিচিৰ ভৌগোলিক পৰিসৰ বৃদ্ধি পোৱাৰ লগতে ইয়াক অধিক ক্ষমতা প্ৰদান কৰা হৈছে বুলিও মোদীয়ে সভাত কয়।
‘‘১৯৯৩ আৰু ২০০৩ চনত দুবাৰকৈ বড়ো শান্তি চুক্তি স্বাক্ষৰিত হোৱাৰ পাছতো শান্তি ঘুৰি অহা নাছিল। কাৰণ সেই চৰকাৰে কেবল মাত্ৰ চুক্তিহে স্বাক্ষৰিত কৰিছিল ইয়াক ৰূপায়নৰ ব্যৱস্থা কৰা নাছিল। এতিয়া বড়ো ভাই-ভনী সকলে ন্যায় পালে আৰু গুলী-বাৰুদৰ দিনৰ অন্ত ঘটিল,’’ প্ৰধান মন্ত্ৰী মোদীয়ে সভাত এইদৰে কয়।
তদুপৰি, ভাষণতে মোদীয়ে বড়ো জনগোষ্ঠীৰ উন্নয়নৰ বাবে ১৫০০ কোটিৰ বিশেষ পেকেজ আগবঢ়োৱা হ’ব বুলি উল্লেখ কৰি ইয়াৰ দ্বাৰা বড়ো সকলৰ ভাষা, সংস্কৃতি তথা বিকাশ সাধন হ’ব বুলি মন্তব্য কৰে।
