ভাৰতৰ মহিলা হকী দলে ক্ৰীড়া সূচী অনুসৰি থকা চীন ভ্ৰমণ বাতিল কৰিছে ক’ৰ’না ভাইৰাছৰ আতংকৰ বাবে।
১৪ মাৰ্চৰ পৰা ২৫ মাৰ্চলৈ ভাৰতীয় মহিলা হকী দলে চীন ভ্ৰমণ কৰাৰ কথা আছিল।
‘‘আমি চীন ভ্ৰমণ কৰাৰ কথা আছিল কিন্তু ক’ৰ’না ভাইৰাছৰ দ্ৰুত সংক্ৰমণৰ বাবে আমি চীন ভ্ৰমণ বাতিল কৰিবলগীয়া হয়,’’ ভাৰতীয় মহিলা হকী দলৰ অধিনায়ক ৰাণীয়ে কয়।
ভাৰতে আগন্তুক অলিম্পিকৰ প্ৰস্তুতিৰ বাবে চীনৰ সৈতে হকী শৃংখলাৰ সূচী ৰাখিছিল বুলি হকী ইণ্ডিয়াই উল্লেখ কৰি খেলুৱৈ সকলৰ স্বাস্থ্য প্ৰধান বুলি মত প্ৰকাশ কৰে।
উল্লেখযোগ্য যে, চীনৰ হুৱাইন প্ৰদেশত ক’ৰ’না ভাইৰাছে ভয়াবহ ৰূপ ধাৰণ কৰিছে। প্ৰায় সহস্ৰাধিক লোক এই ভাইৰাছৰ সংক্ৰমণৰ ফলত মৃত্যু মুখত পৰিছে.
ভাৰতৰ লগতে বিশ্বৰ বহু কেইখন দেশে চীনৰ সৈতে বিমান সেৱা বন্ধ কৰাৰ লগতে চীনৰ পৰা আমদানিকৃত খাদ্য সামগ্ৰী নিষিদ্ধ কৰিছে।
চীনৰ প্ৰতিবেশী হোৱা বাবে ভাৰতকো বিশ্ব স্বাস্থ্য সংস্থাই ক’ৰ’না ভাইৰাছ সংক্ৰমণৰ ক্ষেত্ৰত সংবেদনশীল দেশৰ তালিকাত ৰাখিছে।
