শিৱসাগৰ জিলা উপায়ুক্ত ডাঃ এম এছ লক্ষ্মীপ্ৰিয়াই মিছন ‘ছৌলফুল শিৱসাগৰ’ অভিযানৰ অধীনত যোৱা ৭ জানুৱাৰিত আৰম্ভ কৰা ‘খেল’ শিৱসাগৰ খেল’ শীৰ্ষক অভিলাসী ক্ৰীড়া পদক্ষেপৰ দেওবাৰে স্থানীয় পিয়লি ফুকন ষ্টেডিয়ামত সফল সামৰণি পৰে।
‘খেল’ শিৱসাগৰ খেল’-ৰ সামৰণি অনুষ্ঠানত মুখ্য অতিথিৰূপে অংশগ্ৰহণ কৰি অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ স্বতন্ত্ৰ তথা গড়কাপ্তানী বিভাগৰ ৰাজ্যিক মন্ত্ৰী যোগেন মহনে নিজ বক্তব্যত জিলাখনৰ ক্ৰীড়া ক্ষেত্ৰৰ উন্নতিৰ বাবে জিলা উপায়ুক্তই গ্ৰহণ কৰা প্ৰচেষ্টা সমূহৰ ভূয়সী প্ৰশংসা কৰে।
’খেল’ শিৱসাগৰ খেল’য়ে জিলাখনত ক্ৰীড়াৰ ক্ষেত্ৰত এক নতুন দিগন্তৰ সুচনা কৰিছে বুলি উল্লেখ কৰি মন্ত্ৰী গৰাকীয়ে জিলা প্ৰশাসনৰ প্ৰচেষ্টা সমূহত অভিভাৱক, শিক্ষাগুৰু আৰু ৰাইজক পূৰ্ণ সহযোগিতা আগবঢ়াবলৈ আহ্বান জনায়।
ক্রীড়াৰ জনপ্ৰিয়তা বৃদ্ধি আৰু খেলুৱৈ সকলক উৎসাহিত কৰাৰ এই মহৎ প্ৰচেষ্টাৰ ধাৰাবাহিকতা ৰক্ষাৰ নিতান্তই প্ৰয়োজনীয়তা আছে বুলি তেওঁ দৃঢ় মত পোষণ কৰে।
খেলৰ দ্বাৰা শাৰীৰিক-মানসিক শ্ৰীবৃদ্ধি ঘটে বুলি মন্তব্য কৰি তেওঁ সৰুৰে পৰা শিশুসকলক খেলৰ প্ৰতি ধাউতি বঢ়াবলৈ আহ্বান জনায়।
মন্ত্ৰী গৰাকীয়ে জিলাখনৰ ক্রীড়া খণ্ডৰ উন্নতিৰ হকে প্ৰয়োজনীয় চৰকাৰী সহযোগিতা আগবঢ়োৱাৰো আশ্বাস প্ৰদান কৰে।
থাওৰা সমষ্টিৰ বিধায়ক কুশল দুৱৰীয়ে ভাষণ প্ৰসংগত জিলা প্ৰশাসন আৰু উপায়ুক্তৰ প্ৰচেষ্টাৰ শলাগ লৈ কয় যে এনে প্রচেষ্টাই নিশ্চিতভাৱে খেলুৱৈসকলক আগবাঢ়ি যাবলৈ অনুপ্ৰাণিত কৰিব।
তেওঁ কয় যে খেলৰ জড়িয়তে স্বাস্থ্য ৰক্ষাৰ লগতে নিজকে প্ৰতিষ্ঠা কৰা আৰু জিলা, ৰাজ্য তথা দেশলৈ গৌৰৱ কঢ়িয়াই অনা সম্ভৱ হৈ উঠে।
অনুষ্ঠানত অংশগ্ৰহণ কৰি অসম ক্ৰিকেট এছ’চিয়েশ্যনৰ সভাপতি ৰমেন দত্তই কয় যে, এছ’চিয়েশ্যনৰ ফালৰ পৰা ৰাজ্য খনত অতি কমেও ১০ খন খেলপথাৰ স্থাপন কৰাৰ পৰিকল্পনা কৰা হৈছে। এই সন্দৰ্ভত অন্ততঃ ৩০ বিঘাকৈ মাটিৰ প্ৰয়োজন, যাৰ বাবে জিলাৰ ক্রীড়া বিভাগ সমুহক আগবাঢ়ি আহিবলৈ এছ’চিয়েশ্যনৰ তৰফৰ পৰা আহ্বান জনোৱা হৈছে।
ক্রীড়াৰ ক্ষেত্ৰত জিলাখনক স্বকীয় পৰিচয়েৰে মহীয়ান কৰি তোলাৰ প্ৰয়াস স্বৰূপে গ্ৰহণ কৰা ‘খেল’ শিৱসাগৰ খেল’ অভিযানৰ সফল সামৰণিত সন্তুষ্টি প্ৰকাশ কৰি নিজ বক্তব্যত উপায়ুক্ত গৰাকীয়ে কয় যে, জিলাখনৰ খেলুৱৈ সকলৰ প্ৰতিভা আৰু সম্ভাৱনীয়তাৰ প্ৰতি লক্ষ্য কৰিলে ৰাজ্যিক, ৰাষ্ট্ৰীয় তথা আন্তঃৰাষ্ট্ৰীয় পৰ্য্যায়ত যে তেওঁলোকে সুনাম অৰ্জন কৰিবলৈ সক্ষম হ’ব সেয়া সহজেই অনুমেয়।
জিলাখনে অদূৰ ভৱিষ্যতে একোগৰাকী অলিম্পিয়ানৰ লাভ কৰিব পাৰিব বুলি তেওঁ আশা প্ৰকাশ কৰে।
ৰাষ্ট্ৰীয় পৰ্য্যায়ৰ খেলৰ ২৪ টা শিতানত অনুষ্ঠিত এই খেল’ শিৱসাগৰ খেল’ৰ প্ৰতিযোগিতাৰ খেল সমূহত অংশগ্ৰহণকাৰীৰ বিপুল সঁহাৰি প্ৰত্যক্ষ কৰি তেওঁ অতিকে গৌৰৱান্বিত বুলি উল্লেখ কৰে।
ভাৰতীয় ক্রীড়া প্ৰাধিকৰণৰ চয়নকর্তাৰ দল অহা ১৫ ফেব্ৰুৱাৰীত জিলাখনত আহি জিলাখনৰ শ্ৰেষ্ঠ খেলুৱৈ সকলৰ পৰা বাচনি কৰি প্ৰশিক্ষণ প্ৰদান কৰাৰ বাবে চূড়ান্ত কৰিব।
তেওঁ লগতে অৱগত কৰে যে, জিলাখনৰ দুগৰাকী খেলুৱৈক অসম চৰকাৰৰ ফালৰ পৰা থাইলেণ্ডত এক্সপ’জাৰ ভিজিট (exposure visit)-ৰ বাবে প্ৰেৰণ কৰা হ’ব।
জিলা উপায়ুক্তই পতাকা উত্তোলনেৰে সামৰণি অনুষ্ঠানটিৰ শুভাৰম্ভণি কৰাৰ পিছত ৰাজহ মন্ত্ৰী গৰাকীৰ সৈতে জিলাখনৰ বিভিন্ন প্ৰান্তৰ স্কুলৰ ছাত্ৰ-ছাত্ৰীৰ লগতে বেণ্ড প্লাটুনৰ দ্বাৰা প্ৰদৰ্শিত মাৰ্চ পাষ্টৰ অভিবাদন গ্ৰহণ কৰে৷
দেওবাৰে সামৰণি অনুষ্ঠানত ১৭ বছৰ বয়সৰ অনুৰ্দ্ধৰ ল’ৰা আৰু ছোৱালীৰ ফুটবল আৰু ১০০ মিটাৰ দৌৰৰ চূড়ান্ত প্ৰতিযোগিতাও অনুষ্ঠিত হয়।
অনুষ্ঠানটিত বিভিন্ন ক্রীড়া শিতানত বিজয়ী প্ৰতিযোগী সকলক বঁটা প্ৰদান কৰা হয়।
