মূলসুঁতিলৈ ঘূৰি অহা এন ডি এফ বিৰ চাৰিওটা গোট আৰু এবছুৱে আগন্তুক বিটিচি নিৰ্বাচনত হাগ্ৰামা নেতৃত্বাধীন বি পি এফক কোনো ধৰণে ক্ষতিগ্ৰস্ত কৰিব নোৱাৰে বুলি আজি মন্তব্য কৰিছে সমাজ কল্যাণ মন্ত্ৰী প্ৰমিলা ৰাণী ব্ৰহ্মই।
সংবাদ মাধ্যমৰ আগত মন্তব্য প্ৰকাশ কৰি ব্ৰহ্মই কয় যে আত্মসমৰ্পণ কৰা এন ডি এফ বিৰ সদস্য সকলৰ নিৰ্বাচনত প্ৰতিদ্বন্দ্বিতা কৰাৰ সম্পূৰ্ণ অধিকাৰ আছে।
এন ডি এফ বিৰ গোট চাৰিটাই যাৰ লগত বিচাৰে তাৰ লগতেই থাকিব পাৰিব বুলিও বি পি এফৰ নেত্ৰীগৰাকীয়ে উল্লেখ কৰে।
বড়ো ছাত্ৰ সংগঠন এবছু সম্পৰ্কেও মন্ত্ৰীগৰাকীয়ে কেতবোৰ গুৰুত্বপূৰ্ণ মন্তব্য কৰে। তেওঁ কয় যে পৰিবেশ বেলেগ হ’লহেতেন যদিহে এবছু আমাৰৰ লগত থাকিল হৈ, কিন্তু আমি প্ৰত্যাহ্বান গ্ৰহণ কৰিবলৈ সাজু আছো।
বি পি এফে বিটিচি নিৰ্বাচন সময়মতে অনুষ্ঠিত কৰাৰ পক্ষত আছে আৰু নিৰ্বাচনত বিজেপি-অগপৰ সৈতে মিত্ৰজোঁটতে প্ৰতিদ্বন্দ্বিতা আগবঢ়োৱা হ’ব বুলি মন্তব্য কৰে ব্ৰহ্মই।
বিজেপিক চাৰিখন আৰু অগপক এখন আসন এৰি দিব বুলিও জানিবলৈ দিয়ে।
উল্লেখযোগ্য যে ২৭ জানুৱাৰিত ঐতিহাসিক বড়ো চুক্তি স্বাক্ষৰ কৰা এন ডি এফ বিৰ চাৰিওটা গোটে লগ লাগি নতুন আঞ্চলিক ৰাজনৈতিক দল গঠন হ’ব বুলি চৰ্চা চলি থকা বিষয়টো সন্দৰ্ভত ব্ৰহ্মই মন্তব্য কৰি কয়, ‘যদি তেওঁলোকে নিৰ্বাচনত অৱতীৰ্ণ হয় তেন্তে তেওঁলোকক আদৰণি জনাইছো’।
