শুনিবলৈ আচৰিত যেন লাগিলেও বাস্তৱত তেনে এক ঘটনাই ঘটিল। খালী ঘৰত চোৰ কৰিবলৈ সোমাই চোৰে চোৰ কৰাৰ সলনি দেৱালত মাৰ্কাৰ পেনেৰে লিখি বিচাৰিলে ক্ষমা প্ৰাৰ্থনা।
বুধবাৰে এই ঘটনা ঘটিছে কেৰালাৰ কোচিৰ ত্ৰিপুনিথুৰা অঞ্চলত।
সূত্ৰ অনুসৰি জানিব পৰা মতে, ত্ৰিপুনিথুৰা অঞ্চলৰ এটি বাসগৃহত পত্নী আৰু সন্তানৰ সৈতে বাস কৰে এগৰাকী ভাৰতীয় সেনাবাহিনীৰ অৱসৰপ্ৰাপ্ত কৰ্ণেল। নাম তেওঁৰ ইছাক মানি।
প্ৰায় দুমাহ পূৰ্বে পৰিয়ালটো বাহিৰলৈ ফুৰিব গৈছিল। খালী ঘৰটোত দিনৰ ভাগত দুজন কাম কৰা শ্ৰমিক আৰু এগৰাকী পৰিচাৰিকাই ঘৰৰ কামবন কৰে।
ঘৰটোত নিশা কোনো নাথাকে। বুধবাৰে পুৱা পৰিচাৰিকাগৰাকীয়ে কাম কৰিবলৈ আহি দেখা পায় যে ঘৰৰ সন্মুখৰ দুৱাৰখন ভগা অৱস্থাত আছে আৰু ঘৰৰ আচবাব-পত্ৰ ইপিনে-সিপিনে সিঁচৰতি হৈ পৰি আছে।
ঘটনাটো দেখি শংকিত হৈ তাই লগে লগে আৰক্ষীক ফোন কৰে। আৰক্ষীয়ে খৱৰ পোৱাৰ পাছতে তদন্তৰ বাবে ঘটনাস্থলীত উপস্থিত হৈ আচৰিত হৈ পৰে।
তেওঁলোকে এখন দেৱালত মাৰ্কাৰ পেনেৰে ডাঙৰ ডাঙৰকৈ লিখা বাইবেলৰ সাত নম্বৰ নিৰ্দেশ ‘চুৰি নকৰিব’ (Thou shalt not steal) প্ৰত্যক্ষ কৰে।
সেয়াই নহয়, তাৰ তলতে সৰু আখৰেৰে লিখা ৰৈছে, ‘’ঘৰত সোমোৱাৰ পূৰ্বে মই এই ঘৰৰ মালিকৰ পৰিচয় মুঠেও জনা নাছিলো। সেয়েহে ভুল কৰি ইয়াত সোমাইছিলো। কিন্তু ঘৰত প্ৰৱেশ কৰাৰ পাছত ভাৰতীয় সেনাৰ টুপী পৰিধান কৰা ঘৰৰ মালিকৰ পৰিচয় জানিব পাৰো। ইয়াত চুৰি কৰিবলৈ সোমাই বাইবেলত উল্লেখিত ১০টা নিৰ্দেশৰ সাত নম্বৰ নিৰ্দেশটো ভংগ কৰিছো। তাৰ বাবে মই ক্ষমা বিচাৰিছো।‘’
আৰক্ষী সূত্ৰই জানিব দিয়া মতে, ‘দেশপ্ৰেমী’ চোৰটোৱে অৱসৰপ্ৰাপ্ত কৰ্ণেলৰ ঘৰৰ একো বস্ত চোৰ কৰি নিয়া নাই। ইয়াৰ সলনি ক্ষমা বিচাৰি দেৱালত মাৰ্কাৰ পেনেৰে লিখি থৈ গৈছে।
অৱশ্যে, ঘৰত মজুত থকা বটলৰ পৰা অলপমান মদ পান কৰি এটা নথিপত্ৰ থকা বেগ কাষৰ দোকানীক উভতাই দিয়াৰ বাবে মালিকক অনুৰোধ কৰি থৈ যায়।
তদন্ত অনুসৰি, কৰ্ণেলৰ ঘৰত চোৰ কৰিবলৈ সোমোৱাৰ পূৰ্বে চোৰটোৱে কাষৰেই এখন দোকানত টকা আৰু আৱশ্যকীয় নথি সম্বলিত বেগ চুৰি কৰিছিল।
আৰক্ষীয়ে এই ব্যতিক্ৰমী চোৰটোৰ সন্ধানত অভিযান অব্যাহত ৰাখিছে।
