মহানগৰীত ভাড়া মৰা ওলা, উবেৰ আৰু অন্যন্য কেবৰ বাবে লাগিব নতুন পাৰ্মিট।
অল আছাম ওলা-উবেৰ কেব অপাৰেটৰ সন্থাই এই কথাত ক্ষোভ প্ৰকাশ কৰিছে।
মহানগৰবাসীৰ যাতায়তৰ সুবিধাৰ্থে থকা ওলা-উবেৰৰ চালক তথা মালিকৰ মাজত আহি পৰিছে এক নতুন বিপদ। ভাড়া মৰা ওলা-উবেৰৰ পূৰ্বৰ পাৰ্মিটৰ লগতে লাগিব নতুন এক অনুমতি পত্ৰ।
শনিবাৰে এই নতুন নিৰ্দেশনাৰ বিষয়ে নৰ্থ ইষ্ট নাওৰ সাংবাদিকক অৱগত কৰিছে কামৰূপ মহানগৰ জিলা পৰিবহণ বিষয়া বাপন কলিতাই।
তেওঁ কয় “ওলা-উবেৰ গুৱাহাটীত বন্ধ নহয়, চলি থাকিব। কিন্তু তাত এটা প্ৰযুক্তিগত কথা আছে। বহু ওলা-উবেৰৰ পাৰ্মিট তিনিখন ৰাজ্যৰ বাবে থাকে। যান বাহন আইন অনুসৰি এইখন পাৰ্মিটৰে এখন জিলাত চলাচল কৰিব নোৱাৰে তথা যান বাহন আইনৰ পৰিপন্থী।”
তদুপৰি পূৰ্তে ৰাজ্যৰ পৰিবহণ বিভাগে এটা সিদ্ধান্ত লৈ থৈছিল বুলি জানিবলৈ দি কলিতাই কয় “যদিও ওলা-উবেৰ কেবৰ তিনিখন ৰাজ্যৰ পাৰ্মিট আছে, তথাপি তেওঁলোকে মহানগৰ জিলাৰ বাবেও পাৰ্মিট ল’ব লাগিব। গতিকে মালিক সন্থাক মাতি আনি তেওঁলোকৰ পাৰ্মিটসমূহ ঠিক কৰি ল’বলৈ নিৰ্দেশ দিয়া হৈছে।”
ইপিনে, জিলা পৰিবহণ বিষয়াৰ এই সিদ্ধান্তৰ পাছতে ইয়াক ধিক্কাৰ দিছে সদৌ অসম ওলা উবেৰ কেব অপাৰেটৰ সন্থাই। নতুন পাৰ্মিটৰ সিদ্ধান্তক হঠকাৰী সিদ্ধান্ত আখ্যা সন্থাৰ সভাপতি ইছমাইল আলিৰ।
সংবাদ মাধ্যমৰ আগত তেওঁ কয় ‘আমাৰ যিখিনি বাণিজ্যিক বাহন আছে, সেইখিনি তিনিখন ৰাজ্য আৰু লগতে অসমৰ পাৰ্মিট লৈ চলাই আছো। চৰকাৰে কোনোধৰণৰ সংস্থাপন দিব নোৱাৰাৰ বাবে শিক্ষিত নিবনুৱা হিচাপে গাড়ীখন চলাই পেটৰ ভাত মুকলি কৰিছো। তেনেক্ষেত্ৰত নতুন কিছুমান মাধমাৰ মাৰি আমাক হাৰাশাস্তি কৰিছে।”
তেওঁৰ প্ৰশ্ন “কি যুক্তিত তিনিখন ৰাজ্য বা অসমৰ পাৰ্মিট থকাৰ পাছতো গুৱাহাটী মহানগৰীৰ ভিতৰত ঘূৰিব নোৱাৰো? গুৱাহাটীৰ পাৰ্মিট লোৱা সুবিধা বন্ধ থকাৰ বাবে আমি পূৰ্বতে তিনিখন ৰাজ্যৰ পাৰ্মিট লৈছিলো, কিন্তু সেই চিষ্টেমটো তেতিয়াই কিয় বন্ধ কৰা নাছিল?”
উল্লেখযোগ্য যে, পৰিবহণ বিভাগৰ এই সিদ্ধান্তৰ পাছতে আজি সন্থাৰ সদস্যসকলে বৰঝাৰ বিমান বন্দৰত উত্তাল প্ৰতিবাদ সাব্যস্ত কৰে।
