দৰং জিলাৰ উপায়ুক্ত ঘনশ্যাম দাসৰ বিৰুদ্ধে বিজেপিৰ প্ৰাক্তন সাংসদ ৰমেন ডেকাই লোকসভাৰ অধ্যক্ষ ওম বিৰলাৰ ওচৰত অভিযোগ দাখিল কৰে।
অধ্যক্ষগৰাকীক দিয়া অভিযোগত ডেকাই ঘনশ্যাম দাসক এজন ‘অহংকাৰী বিষয়া’ বুলি অভিহিত কৰি তেওঁৰ অমনোযোগিতাৰ বাবেই কেন্দ্ৰীয় চৰকাৰৰ সংশ্লিষ্ট বিভাগে সাংসদ পুঁজিৰ শেষৰটো কিস্তি প্ৰায় ২.৫ কোটি টকা মোকলাই নিদিলে।
‘এই পুঁজিখিনি মোকলাবৰ বাবে কেনেধৰণৰ ব্যৱস্থা গ্ৰহণ কৰিব লাগিব সেই বিষয়ে জানিব বিচৰাত তেওঁ কোনো সহায় নকৰিলে। মন কৰিব লগীয়া যে তেওঁ মোৰ কোনো প্ৰশ্নৰ উত্তৰে নিদিলে’। ডেকাই কয়।
সন্মানীয় তথা বিশেষ পদত অধিষ্ঠিত হৈ থকা দাসৰ দৰে এজন আই এ এছ বিষয়াৰ এনে কৰ্ম-কাণ্ড তথা ব্যৱহাৰ শুভ লক্ষণ নহয় বুলিও প্ৰাক্তন সাংসদগৰাকীয়ে মন্তব্য কৰে।
তেওঁ লগতে কয়, ‘সাংসদ পুঁজি ব্যৱহাৰ কৰা হয় সমষ্টিৰ উন্নয়নৰ বাবে। কিন্তু জিলাৰ উচ্চ পদস্থ বিষয়াগাৰীকৰ সহযোগিতাৰ অভাৱৰ বাবেই উন্নয়নত ব্যঘাত জন্মিছে’।
উল্লেখ্য যে পঞ্চদশ আৰু ষষ্ঠদশ লোকসভা নিৰ্বাচনত মঙলদৈ সমষ্টিৰ পৰা বিজেপিক প্ৰতিনিধিত্ব কৰি সাংসদ হৈছিল ৰমেন ডেকা।
‘অসমৰ পৰা মই একেৰাহে দুবাৰ সাংসদ হৈছিলো। উপায়ুক্তগৰাকীয়ে অলপ সন্মান আৰু তেওঁৰ প্ৰশ্নৰ উত্তৰ দিব লাগে’ বুলি মন্তব্য কৰে ডেকাই।
উপায়ুক্ত গৰাকীৰ বিৰুদ্ধে ব্যৱস্থা গ্ৰহণৰ বাবে ডেকাই প্ৰধান মন্ত্ৰী নৰেন্দ্ৰ মোদীক সাক্ষাৎ কৰিব বুলিও সংবাদ মাধ্যমৰ জৰিয়তে সদৰী কৰে।
