দুটা ফৈদৰ মাজত আৰম্ভ হোৱা সংৰ্ঘষৰ পাছত অগ্নিগৰ্ভ হৈ পৰা মেঘালয়ৰ পৰিস্থিতি এতিয়াও আতংকময় হৈ আছে।
শ্বেলা আৰক্ষী থানাৰ পৰা পোৱা খৱৰ অনুসৰি দেওবাৰে পুৱা পিৰকান গাঁৱৰ বি লিণ্ডাইৰ স্বামী আপহাস উদ্দিন(৩৭)ক প্ৰায় তিনিজনমান অচিনাক্ত দুৰ্বৃত্তই পিৰকান গাঁৱৰ ঘৰতে আক্ৰমণ কৰি গুৰুতৰভাৱে আহত কৰে।
তেওঁক খামাটিৰ হাস্পাতললৈ লৈ অনা হয় যদিও চিকিৎসকে মৃত বুলি ঘোষণা কৰে।
ইপিনে, শনিবাৰে নিশাৰ ভাগত প্ৰায় ৯-৩০ বজাত একাংশ অচিনাক্ত দুৰ্বৃত্তই শ্বিলঙৰ পিন্থ’ৰবাহ ব্লক -৪’ত লক্ষ্মী বৰেহৰ বাসগৃহৰ চৌহদত পেট্ৰ’ল বোমা নিক্ষেপ কৰে।
অৱশ্যে, এই ঘটনাত কোনো লোক হতাহত হোৱা নাই বা বিশেষ ক্ষতি হোৱা নাই।
ইপিনে দেওবাৰে পুৱতি নিশা প্ৰায় ১২ৰ পৰা ১ বজাৰ ভিতৰত মৌচিনৰামৰ মাউথাবাহত শনিবাৰে অচিনাক্ত দুৰ্বৃত্তৰ আক্ৰমণত বলি হোৱা এজন লোকক নেইগ্ৰীমছত ভৰ্তি কৰোৱা হয়।
আক্ৰমণৰ বলি হোৱা লোকজন (৩১) পশ্চিম গাৰো পাহাৰপৰ ফুলবাৰীৰ আক্ৰামুল জামানৰ পুত্ৰ ৰাজুৱা কৰিম আৰু তেওঁ বৰ্তমান মেঘালয় বেচিন ডেভেলপমেন্ট এজেন্সিত কাম কৰে।
যোৱা ৬ বছৰ ধৰি তেওঁ মদনৰ্টিঙৰ শ্বলাডত বাস কৰি আছে।
নংপ’ আৰক্ষী সূত্ৰই প্ৰকাশ কৰা মতে, দেওবাৰে পুৱতি নিশা প্ৰায় ৩-১৫ বজাত ৰি-ভইৰ উমট্ৰ’ত থকা একাংশ অজনজাতীয় কাঠমিস্ত্ৰী দুখন বাছত অহা স্থানীয় যুৱকৰ ভয়ত বনাঞ্চললৈ পলাই যায়।
ৰি-ভইৰ আৰক্ষী অধীক্ষকে জানিবলৈ দিয়া মতে তেওঁলোকে পাছত ঘৰলৈ ঘুৰি আহে।
আনহাতে, অশান্ত জৰ্জৰ পৰিস্থিতিলৈ লক্ষ্য ৰাখি প্ৰশাসনে শ্বিলঙত দেওবাৰে পুৱা ৮ বজাৰ পৰা অনিৰ্দিষ্টকালীন সান্ধ্য আইন জাৰি কৰিছে।
