এগৰাকী ৩৯ বছৰীয়া এজন হৃদৰোগ বিশেষজ্ঞৰ হাৰ্ট এটেকত মৃত্যু হৈছে। চেন্নাইৰ সভিথা মেডিকেল কলেজৰ কনচালটেণ্ট কাৰ্ডিয়াক চাৰ্জন ডাঃ গ্ৰেডলিন ৰয় বুধবাৰে চিকিৎসালয়তে অসুস্থ হৈ পৰে।
হায়দৰাবাদৰ স্নায়ু বিশেষজ্ঞ ডাঃ সুধীৰ কুমাৰ এক্স-ত (পূৰ্বতে টুইটাৰ) লিখিছে, “সহকৰ্মীসকলে তেওঁক বচাবলৈ যৎপৰোনাস্তি চেষ্টা কৰিছিল। চিপিআৰ, জৰুৰীকালীন এঞ্জিওপ্লাষ্টি, ষ্টেণ্টিং, আইএবিপি আনকি ইচিএমঅ’ইও তেওঁৰ জীৱন ৰক্ষা কৰিব পৰা নোৱাৰিলে।” ডাঃ কুমাৰে কয় যে তেওঁৰ বাওঁ মূল ধমনী ১০০ শতাংশ বন্ধ হৈ যোৱাৰ ফলত হাৰ্ট এটেক হৈছিল।
ড০ কুমাৰে লগতে কয় যে গ্ৰেডলিন ৰয়ৰ মৃত্যু কোনো বিচ্ছিন্ন ঘটনা নহয়। যোৱা কেইবছৰমানৰ পৰা ৩০-৪০ বছৰীয়া যুৱ চিকিৎসকৰ মাজত হঠাৎ হাৰ্ট এটেক হোৱাৰ এক উদ্বেগজনক ধাৰা দেখা গৈছে।
বিশেষজ্ঞসকলৰ মতে, চিকিৎসকৰ মৃত্যুৰ আঁৰত কেইবাটাও কাৰণ আছে। যেনে:
১) অত্যধিক কামৰ বোজাঃ চিকিৎসকে প্ৰায়ে দিনটোত ১২ৰ পৰা ১৮ ঘণ্টা কাম কৰিবলগীয়া হয়। কেতিয়াবা ২৪ ঘণ্টাৰো অধিক কাম কৰিবলগীয়া হয়।
২) মানসিক চাপঃ জীৱন-মৃত্যুৰ সিদ্ধান্ত লোৱাৰ হেঁচা, ৰোগীৰ পৰা অধিক আশা, আইনী জটিলতাৰ ভয় আদিয়ে তেওঁলোকৰ ওপৰত তীব্ৰ মানসিক চাপৰ সৃষ্টি কৰে।
৩) অস্বাস্থ্যকৰ জীৱনশৈলীঃ অনিয়মিত খাদ্যাভ্যাস, শাৰীৰিক ক্ৰিয়া-কলাপৰ অভাৱ, আত্মস্বাস্থ্য পৰীক্ষাৰ অৱহেলাও ইয়াৰ বাবে দায়ী।
৪) মানসিক স্বাস্থ্যৰ প্ৰতি অৱহেলা: পেছাদাৰী মানসিক চাপৰ ফলত হোৱা হতাশা, উদ্বেগ, মানসিক ক্লান্তি প্ৰায়ে আওকাণ কৰা হয়, যাৰ ফলত তেওঁলোকৰ স্বাস্থ্যৰ ওপৰত বেয়া প্ৰভাৱ পৰে।
এই ঘটনাই পুনৰবাৰ পোহৰলৈ আনিছে চিকিৎসকৰ কষ্টকৰ কৰ্মজীৱনৰ বাস্তৱতা আৰু তেওঁলোকৰ স্বাস্থ্যৰ প্ৰতি থকা বিপদৰ সমস্যা।
