অভিনেত্ৰীক ধৰ্ষণৰ অভিযোগত গ্ৰেপ্তাৰ কৰা হৈছে চলচ্চিত্ৰ পৰিচালকক। ৩৩ বছৰীয়া অভিনেত্ৰী এগৰাকীৰ এজাহাৰৰ ভিত্তিত গ্ৰেপ্তাৰ কৰা হৈছে পৰিচালক শাকীল নুৰানীক। ‘বড়ে দিলৱালে’, ‘জোৰু কা গোলাম’ৰ দৰে জনপ্ৰিয় ছবিৰ নিৰ্মাতা-পৰিচালক ৭৩ বছৰীয়া নুৰানী।
বিভিন্ন সংবাদ মাধ্যমৰ বাতৰি অনুসৰি, সম্ভাব্য এখন চিনেমাৰ আলোচনাৰ অজুহাতত নুৰাণীয়ে অভিনেত্ৰীগৰাকীক মালৱানীস্থিত নিজৰ ঘৰলৈ মাতি আনি যৌন নিৰ্যাতন চলোৱাৰ অভিযোগ উত্থাপন হৈছে। অভিযোগনামাত অভিনেত্ৰীগৰাকীক অচেতন কৰি পিছত ভিডিঅ’ দেখুৱাই ভাবুকি দিয়া বুলিও উল্লেখ কৰা হৈছে।
আৰক্ষী সূত্ৰই জনোৱা মতে, মহাৰাষ্ট্ৰৰ সাতাৰা জিলাৰ মেধা অঞ্চলৰ এটা ফাৰ্ম হাউচত নুৰাণীক পোৱা গৈছে। ৮ আগষ্টৰ পুৱতি নিশা তেওঁক জিম্মাত লৈ তাৰ পিছত মুম্বাইলৈ অনা হয়।
মালৱানী আৰক্ষীয়ে ভাৰতীয় দণ্ডবিধিৰ ৬৪(২)(এম), ১২৩,৩৫১(২) আৰু ৮৮ ধাৰাত নুৰানীৰ বিৰুদ্ধে গোচৰ ৰুজু কৰিছে।
খবৰ অনুসৰি ২০১৬ চনত লোখাণ্ডৱালাত অনুষ্ঠিত হোৱা মনোৰঞ্জনমূলক বঁটা প্ৰদান অনুষ্ঠানত নুৰানীয়ে প্ৰথম লগ পাইছিল অভিনেত্ৰীগৰাকীক।
অভিনেত্ৰীগৰাকীয়ে অভিযোগ কৰিছে যে ছবি নিৰ্মাতাগৰাকীয়ে তেওঁৰ সৈতে আগন্তুক প্ৰজেক্টৰ বিষয়ে কথা পাতিছিল আৰু কাম সন্দৰ্ভত তেওঁৰ সৈতে যোগাযোগ কৰিবলৈ কৈছিল। তেওঁ দাখিল কৰা এফ আই আৰত কোৱা হৈছে যে পিছত তেওঁ এখন চিত্ৰনাট্যৰ বিষয়ে আলোচনা কৰিবলৈ মালৱানীত থকা নূৰানীৰ বাসগৃহলৈ গৈছিল।
অভিনেত্ৰীগৰাকীৰ অভিযোগ মতে, নুৰাণীয়ে তেওঁক এবিধ পানীয় দিছিল, যিটো পান কৰাৰ পিছত তেওঁ চেতনা হেৰুৱাইছিল। চেতনা অহাৰ পিছত নুৰাণীয়ে তেওঁৰ ফোনত এটা ভিডিঅ’ দেখুৱাই আৰক্ষীৰ ওচৰলৈ গ’লে বা পৰিয়ালক অৱগত কৰিলে ভিডিঅ’টো প্ৰচাৰ হ’ব বুলি ভাবুকি দিয়াৰ দাবী কৰে।
তেওঁ লগতে অভিযোগ কৰে যে পিছত পৰিচালকে ভিডিঅ’টো ব্যৱহাৰ কৰি তেওঁক ভয় দেখুৱাইছিল আৰু বহুবাৰ যৌন নিৰ্যাতন চলাইছিল। যৌন নিৰ্যাতনৰ পিছত পৰিচালকগৰাকীয়ে বাৰে বাৰে গৰ্ভ নিৰোধক বড়ি খাবলৈ বাধ্য কৰাইছিল বুলিও অভিযোগ কৰে অভিনেত্ৰীগৰাকীয়ে।
চিকিৎসাৰ বাবে আৰ্থিক সাহায্যৰ আশাত অভিনেত্ৰীগৰাকীয়ে ২০২৬ চনত মুম্বাইলৈ উভতি অহা বুলি জানিব পৰা গৈছে।
অৱশ্যে পৰিচালকগৰাকীৰ বিৰুদ্ধে উত্থাপিত সকলো অভিযোগ অস্বীকাৰ কৰিছে তেওঁৰ অধিবক্তাই।
