দেশৰ চিকিৎসক মহলক হতবাক কৰি দিয়া এক ঘটনা ঘটিছে দেশৰ ৰাজধানী নতুন দিল্লীত।
কোভিড১৯ নিগেটিভ হোৱা এগৰাকী মাতৃয়ে জন্ম দিয়া এটি নৱজাতকৰ শৰীৰত পোৱা গৈছে কোভিড১৯।
দেশৰ চিকিৎসক মহলৰ মতে এনে ঘটনা এইটোৱে দেশত প্ৰথম।
ঘটনাৰ বিৱৰণী অনুসৰি দিল্লীৰ ৰাম মোহন লোহিয়া(RML) চিকিৎসালয়ত ঘটিছে এই ঘটনা।
১১ জুনত উক্ত চিকিৎলায়তে ভৰ্তি কৰোৱা অন্তঃসত্ত্বা ২৫ বৰ্ষীয় যুৱতীগৰাকীৰ শৰীৰত কোভিড১৯ পোৱা গৈছিল। যুৱতীগৰাকীৰ লগতে তেওঁৰ স্বামীও কোভিড১৯ত আক্ৰান্ত হৈছিল।
২৫ জুনত দ্বিতীয়বাৰৰ বাবে কৰোৱা স্বাস্থ্য পৰীক্ষাটো যুৱতী গৰাকীৰ শৰীৰত পুনৰ কোভিড১৯ পজিটিভ পোৱা যায়।
পিছে ৭ জুলাইৰ কৰা তৃতীয়টো পৰীক্ষাত অন্তঃসত্ত্বা যুৱতী গৰাকীৰ ৰিজাল্ট নিগেটিভ আহে।
ইয়াৰ এদিন পিছতে যুৱতী গৰাকীয়ে এটি সন্তান জন্ম দিয়ে। জন্মৰ ছঘন্টাৰ পিছতে নৱজাতকটিৰ শৰীৰত মৰাত্মক ভাইৰাছবিধৰ উপস্থিতি ধৰা পৰে।
চিকিৎসালয়খনৰ চিকিৎসকৰ মতে, গৰ্ভস্থ অৱস্থাতে কোভিড আক্ৰান্ত মাতৃ গৰাকীৰ পৰা শিশুটিৰ শৰীৰত কোভিড১৯ৰ বীজাণু সংক্ৰমণ ঘটিব পাৰে।
ডাঃ ৰাহুল চৌধুৰী নামৰ চিকিৎসকজনে জনোৱা মতে, প্ৰসৱৰ সময়ত মাতৃগৰাকী কোভিড১৯ মুক্ত হৈছিল। কিন্তু শিশুটি জন্ম হোৱাৰ পিছত দুয়োৰে নমুনা সংগ্ৰহ কৰি পৰীক্ষা কৰা হয়।
এই পৰীক্ষাত মাতৃগৰাকীৰ ৰিজাল্ট নিগেটিভ আহে যদিও নৱজাতকটিৰ ৰিজাল্ট পজিটিভ আহে।
