অসমৰ ৰাজনৈতিক প্ৰেক্ষাপটত মিত্ৰতাক কেন্দ্ৰ কৰি কংগ্ৰেছ আৰু ৰাইজৰ দলৰ মাজত তীব্ৰ সংঘাতৰ সৃষ্টি হৈছে। ৰাইজৰ দলৰ অভিযোগ অনুসৰি কংগ্ৰেছ দলে এতিয়ালৈকে আনুষ্ঠানিকভাৱে মিত্ৰতা ভংগ কৰা নাই যদিও কাৰ্যতঃ চাৰিবাৰকৈ অনানুষ্ঠানিকভাৱে মিত্ৰতা ভংগ কৰিছে। সমষ্টি ভাগ বটোৱাৰাক লৈ আলোচনা চলি থকাৰ মাজতে বৰচলা, ডিমৌ, দিছপুৰ আৰু মাৰ্ঘেৰিটা সমষ্টিত কংগ্ৰেছ দলে একপক্ষীয়ভাৱে প্ৰাৰ্থী ঘোষণা কৰি দিয়াৰ ঘটনাই প্ৰথম আউল লগাইছিল। ইয়াৰ পাছতে ৰাইজৰ দলক সম্পূৰ্ণৰূপে বাদ দি কংগ্ৰেছে সংবাদ মেলযোগে আনুষ্ঠানিকভাৱে মিত্ৰজোঁট ঘোষণা কৰা কাৰ্যই দুয়োটা দলৰ মাজৰ দূৰত্ব বৃদ্ধি কৰে।
বিশেষকৈ ৰঙানদী সমষ্টিটোক কেন্দ্ৰ কৰি দুয়োটা দলৰ মাজত ডাঙৰ বিভেদৰ সৃষ্টি হৈছে। ৰাইজৰ দলৰ মতে, পূৰ্বৰ আলোচনাত ৰঙানদী সমষ্টিটো তেওঁলোকক এৰি দিয়াৰ সিদ্ধান্ত হৈছিল যদিও কংগ্ৰেছে কোনো আলোচনা নকৰাকৈয়ে জয়ন্ত খাউণ্ডক দলত যোগদান কৰোৱাই সেই সমষ্টিৰ প্ৰাৰ্থী হিচাপে প্ৰক্ষেপ কৰে। কেৱল এয়াই নহয়, যোৱা ১০ মাৰ্চৰ মাজনিশা পৰ্যন্ত মিত্ৰতাৰ আলোচনা চলি থকাৰ মাজতে প্ৰদেশ কংগ্ৰেছৰ সভাপতি গৌৰৱ গগৈয়ে ফেচবুকযোগে হঠাৎ মিত্ৰতাৰ বিষয়টোৰ পৰা অলপ সময়ৰ বাবে বিৰতি লোৱা বুলি ঘোষণা কৰে। ৰাইজৰ দলে ইয়াক কংগ্ৰেছৰ একপক্ষীয় আৰু মিত্ৰতা বিৰোধী স্থিতি বুলি অভিহিত কৰিছে।
ৰাইজৰ দলে জনোৱা মতে তেওঁলোকে বিজেপি বিৰোধী ভোট বিভাজন ৰোধ কৰাৰ স্বাৰ্থত ২৭ খন আসনৰ পৰা নিজৰ দাবী হ্ৰাস কৰি মাত্ৰ ১৫ খন আসন বিচাৰিছিল। কিন্তু কংগ্ৰেছে তেওঁলোকক মাত্ৰ কেইখনমান আসনহে পোনপটীয়াকৈ এৰি দি বাকী থকা সমষ্টিবোৰত বন্ধুত্বমূলক প্ৰতিদ্বন্দ্বিতাৰহে প্ৰস্তাৱ দিছিল। ৰাইজৰ দলৰ নেতৃত্বই অভিযোগ কৰিছে যে কংগ্ৰেছৰ ভিতৰচ’ৰাৰ গোষ্ঠীগত সংঘাত আৰু বিভিন্ন নেতাৰ ব্যক্তিগত স্বাৰ্থই মিত্ৰতাৰ আলোচনাত জটিলতাৰ সৃষ্টি কৰিছে। বিৰোধী দলপতি দেৱব্ৰত শইকীয়া, ৰিপুন বৰা, প্ৰদ্যুৎ বৰদলৈ আৰু ৰকিবুল হুছেইনৰ দৰে জ্যেষ্ঠ নেতাই সমষ্টি এৰি দিয়াত সন্মতি দিলেও শেষ মুহূৰ্তত কোনে বিধি পথালি দিছে তাক লৈও প্ৰশ্ন উত্থাপন হৈছে।
বৰ্তমান সময়ত নিৰ্বাচনৰ যিহেতু বেছি দিন বাকী নাই, সেয়েহে ৰাইজৰ দলে মিত্ৰতাৰ নামত কোনো ধৰণৰ বিৰতি নিবিচাৰে। তেওঁলোকৰ স্পষ্ট কথা যে এই গুৰুত্বপূৰ্ণ সন্ধিক্ষণত আলোচনাৰ বিৰতি নহয়, বৰঞ্চ তড়িৎ গতিত মিত্ৰতাৰ বিষয়টো ছীল-মোহৰ মাৰি চূড়ান্ত কৰিব লাগে। অসমৰ ৰাইজৰ স্বাৰ্থত আৰু এক শক্তিশালী বিৰোধী ঐক্য গঠনৰ বাবে কংগ্ৰেছে নিজৰ স্থিতি স্পষ্ট কৰাটো জৰুৰী বুলি ৰাইজৰ দলে মত প্ৰকাশ কৰিছে।
