বিশ্বনাথত ৮ মাহ পাছত গাঁত খান্দি উলিয়ালে পুতি থোৱা মৃতদেহ : ২ হত্যাকাৰীক গ্ৰেপ্তাৰ
বিশ্বনাথত ৮ মাহ পূৰ্বে সংঘটিত হোৱা এক নৃশংস হত্যা কাণ্ডৰ ঘটনা পোহৰলৈ আহিছে। নিজ ককায়েক আৰু ভনী জোঁৱায়েকে মিলি হত্যা কৰি পুতি থলে ভায়েকক। ঘটনাৰ স্থান বিশ্বনাথৰ মাজুলীগড় চাহ বাগিচাৰ অন্তৰ্গত শান্তিপুৰ। চলিত বৰ্ষৰ জানুৱাৰি মাহত সংঘটিত হৈছিল এই নৃশংস হত্যাকাণ্ড।
দীপক তছা আৰু দ্বিপেন তছা সম্পৰ্কত আছিল ভাই-ককাই। দীপক আৰু ভনী জোঁৱাই সুদৰ্শন তছাই ভাতৃ দ্বীপেন তছাক নিজ গৃহতে কোনো নথকা অবস্থাত ডিঙি চেপি নৃশংসভাবে হত্যা কৰি কাষতে থকা দিৰিং নদীৰ পাৰত পুতি থয়। হত্যাকাৰী দীপক তছা আৰু জোঁৱায়েক সুদৰ্শন তছাৰ মতে মৃত দ্বিপেন তছাই প্ৰতিদিনে সুৰাপান কৰি ঘৰত মাক-বাপেকক মাৰধৰ কৰি ঘৰখনত সন্ত্ৰাস সৃষ্টি কৰি সকলোকে অতীষ্ঠ কৰি তুলিছিল।
আনহাতে হত্যাকাৰী দীপক তছাৰ পত্নী ৰিতা তছাই চিকিৎসাধীন হৈ থকা মাক-বাপেকক চিকিৎসালয়ত ভাত দিবলৈ যাওঁতেই দুই ভাতৃৰ মাজত প্ৰায়েই হোৱাৰ দৰে কাজিয়াৰ সূত্ৰপাত হয়। সেই কাজিয়াত তেওঁলোকৰ ভনী জোঁৱাই আৰু দীপক তছাই ঘৰত কোনো নথকাৰ সুযোগ গ্ৰহণ কৰি দ্বীপেন তছাক ডিঙি চেপি হত্যা কৰে। হত্যা কৰি মৃতদেহটো ওচৰতে থকা দিৰিং নদীৰ পাৰত পুতি থয়।
হত্যাকাৰীৰ ঘৰৰ আন সদস্যই দ্বীপেন তছাৰ অনুপস্থিতি গুৰুত্ব সহকাৰে গ্ৰহণ কৰা নাছিল। কাৰণ মৃত দ্বীপেনে পূৰ্বেও ঘৰত কোনো লোকক অবগত নকৰাকৈয়ে অসমৰ বাহিৰত কৰ্মৰ বাবে কেইবাবাৰো গুছি গৈছিল।
কিন্তু এই কথা লাহে লাহে হত্যাকাৰী দীপকৰ পত্নী ৰিতা তছাই গম পায় ৷ অৱশেষত কালি দীপক আৰু ৰিতাৰ মাজত হোৱা কাজিয়া ভাঙিবলৈ যোৱা গাঁৱৰ ৰাইজৰ আগত সকলো কথা বিৱৰি কোৱাত সমগ্ৰ ঘটনা পোহৰলৈ আহিল। গাঁৱৰ ৰাইজৰ তথ্যৰ ভিত্তিত বিশ্বনাথ আৰক্ষীয়ে ইতিমধ্যে দুই হত্যাকাৰীক গ্ৰেপ্তাৰ কৰি নিজৰ জিন্মাত ৰখাৰ লগতে দণ্ডাধীশৰ উপস্থিতিত মৃতদেহটো মাটিৰ পৰা খান্দি মৰণোত্তৰৰ বাবে প্ৰেৰণ কৰিছে।