কোচ ৰাজবংশীসকলৰ ১৪টা সংগঠনৰ প্ৰতিনিধিৰ এটা গোটে আজি মুখ্য মন্ত্ৰী সৰ্বানন্দ সোণোৱালক সাক্ষাৎ কৰি ৬ জনগোষ্ঠীৰ জনজাতিকৰণ সম্বন্ধীয় তথা বিভিন্ন বিষয় সামৰি এক গুৰুত্বপূৰ্ণ আলোচনাত মিলিত হয়।
আলোচনাকালত মুখ্য মন্ত্ৰী সৰ্বানন্দ সোণোৱালে ৬ জনগোষ্ঠীক জনজাতিকৰণ কৰাৰ ক্ষেত্ৰত বিজেপি চৰকাৰৰ প্ৰতি ‘আস্থা আৰু বিশ্বাস’ ৰাখিবৰ বাবে অনুৰোধ জনাই যদিও মুখ্য মন্ত্ৰীৰ সেই পুৰণি মন্তব্যক কোচ ৰাজবংশীৰ প্ৰতিনিধিয়ে পোনচাতেই নাকচ কৰা বুলি জানিব পৰা যায়। নৰ্থ ইষ্ট নাওৰ আগত এই কথা জনায় কোচ ৰাজবংশী ছাত্ৰ সন্থাৰ সাধাৰণ সম্পাদক গোকুল বৰ্মনে।
‘মুখ্য মন্ত্ৰীয়ে আমাক আস্থা আৰু বিশ্বাসত ল’বলৈ দিছে। তেওঁক স্পষ্ট কৰি দিয়া হৈছে যে আস্থা আৰু বিশ্বাসৰ ওপৰত নিৰ্ভৰ কৰিব নোৱাৰা হৈছো’। আলোচনাকালত মুখ্য মন্ত্ৰী সৰ্বানন্দ সোণোৱালক এইদৰে কোৱা বুলি জানিবলৈ দিয়ে আক্ৰাছুৰ সাধাৰণ সম্পাদকগৰাকীয়ে।
আনহাতে শাসনলৈ অহাৰ পাছৰে পৰা মুখ্য মন্ত্ৰী সোণোৱালে কৈ অহা ‘আস্থা আৰু বিশ্বাস’ এতিয়া বাস্তৱক্ষেত্ৰত কাৰ্যকৰী কৰিব লাগে বুলিও ছাত্ৰ নেতাজনে মুখ্য মন্ত্ৰীক দাবী জনায়।
ইপিনে, শাসনৰ গাদীলৈ অহাৰ পৰা কোচ ৰাজবংশীসকলক কেৱল প্ৰতিশ্ৰুতিৰেই আভুৱা ভাঁৰি অহা বুলি দাবী কৰি বৰ্মনে কয় ‘২০১৪ চনৰ পৰা ৫ বছৰ অপেক্ষা কৰিলো। বিজেপিৰ বাবে এয়াই শেষ সুযোগ।‘
‘যদি বিজেপিয়ে এই সুযোগ গ্ৰহণ কৰি ৰাজ্যসভাত জনজাতিকৰণৰ বিলখন পাছ নকৰে, তেন্তে ৬ জনগোষ্ঠীৰ ফালৰ পৰা বিজেপিক উচিত প্ৰত্যুত্তৰ দিয়া হ’ব।‘ এই হুংকাৰ গোকুল বৰ্মণৰ।
আনহাতে, আগন্তুক ৰাজ্যসভাৰ বাজেট অধিবেশনত ৬ জনগোষ্ঠীক জনজাতিকৰণ কৰাৰ বিলখন গৃহীত কৰি পূৰ্ণ পৰ্য্যায়ৰ জনজাতিকৰণ প্ৰদান কৰিবৰ বাবেও আলোচনাকালত কোচ ৰাজবংশীসকলে দাবী জনায়।
‘ৰাজ্য সভাৰ সদন স্থায়ী যদিও লোকসভাৰ নিৰ্বাচনলৈ আৰু বেছি দিন নাই। এতিয়া বিলখন পাছ কৰি তাৰ পাছত ৰৈ যোৱা আঁসোৱাহসমূহ কেন্দ্ৰীয় চৰকাৰে শুধৰাব পাৰিব’। এইদৰে আমাৰ সাংবাদিকৰ আগত কয় বৰ্মনে।
অৱশ্যে, আক্ৰাছুৰ নেতৃত্বই উত্থাপন কৰা বিষয়ৰ ওপৰত মত ব্যক্ত কৰি মুখ্য মন্ত্ৰী সোণোৱালে চৰকাৰৰ সিদ্ধান্তক ইতিবাচক দৃষ্টিভংগীৰে চাবৰ বাবে আহ্বান জনায়।
আজিৰ এই আলোচনা চক্ৰত চৰকাৰৰ ফালৰ পৰা মুখ্য মন্ত্ৰী সৰ্বানন্দ সোণোৱাল, শক্তি বিভাগৰ মন্ত্ৰী তপন গগৈ, বিধায়ক ৰঞ্জিত দাস, অশ্বিনী ৰায়, মুখ্য মন্ত্ৰীৰ প্ৰেছ উপদেষ্টা হৃষিকেশ চৌধুৰীকে ধৰি অন্য বহুকেইজন বিষয়া উপস্থিত থাকে। লগতে কোচ ৰাজবংশী সন্মিলনৰ তৰফৰ পৰা কোচ ৰাজবংশী ছাত্ৰ সন্থাৰ সাধাৰণ সম্পাদক গোকুল বৰ্মন, কোচ ৰাজবংশী সন্মিলনৰ কাৰ্য্যকৰী সভাপতি প্ৰণৱ নাৰায়ণ দেৱ, বিশ্বজিৎ ৰায়কে ধৰি অন্য বহুকেইগৰাকী নেতৃত্ব উপস্থিত থাকে।
