বিশ্বনাথ চাৰিআলিৰ মাজমজিয়াত আজি পুৱা সংঘটিত বিদ্যুৎস্পৃষ্টৰ ঘটনাৰ এক দণ্ডাধীশ পৰ্যায়ৰ তদন্তৰ ঘোষণা কৰিছে বিশ্বনাথ জিলা প্ৰশাসনে। উপায়ুক্তৰ সভাকক্ষত আজি বিয়লি অনুষ্ঠিত এক ৰাজহুৱা সভাত উপায়ুক্ত পৱিত্ৰ ৰাম খাউণ্ডে এই কথা ঘোষণা কৰে।
ঘটনাটোৰ তদন্তৰ বাবে জিলাখনৰ জ্যেষ্ঠ অতিৰিক্ত উপায়ুক্ত তথা অতিৰিক্ত জিলা দণ্ডাধীশ দিগন্ত বৈশ্যক দায়িত্ব অৰ্পণ কৰা হৈছে আৰু এসপ্তাহৰ ভিতৰত প্ৰতিবেদন দাখিল কৰিবলৈ নিৰ্দেশ দিয়া হৈছে। আনহাতে বিদ্যুৎ বিভাগৰ তৰফৰ পৰাও ঘটনাটোৰ এক বিভাগীয় তদন্ত আৰম্ভ হৈছে আৰু কৰ্তব্যত গাফিলতিৰ বাবে প্ৰথম পৰ্যায়ত আজিয়েই দুগৰাকী কৰ্মচাৰীক চাকৰিৰ পৰা নিলম্বন কৰা হৈছে।
মৃতকৰ পৰিয়াল, স্থানীয় ৰাইজ আৰু বিভিন্ন দল-সংগঠনৰ প্ৰতিনিধিৰ উপস্থিতিত অনুষ্ঠিত আজিৰ সভাতে উপস্থিত সকলোৱে বিদ্যুৎ বিভাগৰ গাফিলতিক কঠোৰ ভাষাৰে নিন্দা কৰে আৰু ঘটনাত দোষী সাব্যস্ত হোৱাসকলৰ বিৰুদ্ধে কঠোৰ শাস্তিৰ দাবী তোলে।
আনহাতে ৰাইজে উপায়ুক্তৰ জৰিয়তে অসমৰ শক্তি মন্ত্ৰীলৈ এখন স্মাৰকপত্ৰও প্ৰেৰণ কৰে য’ত মৃতকৰ পৰিয়ালক ২০ লাখ টকাৰ ক্ষতিপূৰণ প্ৰদানৰ লগতে পৰিয়ালৰ এগৰাকী সদস্যক স্থায়ী কৰ্মসংস্থাপন প্ৰদানৰ দাবী তোলে।
স্মাৰকপত্ৰত আজিৰ পৰা দুবছৰৰ আগেয়ে অনুৰূপ ঘটনাত আহত হৈ পিছত মৃত্যুক সাবটি লোৱা একে অঞ্চলৰে দিপক দাস নামৰ লোকজনৰ পৰিয়ালকো প্ৰয়োজনীয় ক্ষতিপূৰণ আৰু কৰ্মসংস্থাপন প্ৰদানৰ কথা উল্লেখ কৰা হয়।
সভাত উপস্থিত থকা অসম শক্তি বিতৰণ কোম্পানী লিমিটেডৰ তেজপুৰ চক্ৰৰ মুখ্য কাৰ্যবাহী বিষয়া ৰঞ্জনা শৰ্মাই মৃতকৰ পৰিয়াললৈ তাৎক্ষণিক ক্ষতিপূৰণ হিচাপে আঢ়ৈ লাখ টকাৰ এখন চেক প্ৰয়াত ৰবীন দাসৰ পিতৃ কলীয়া দাসৰ হাতত অৰ্পণ কৰে। তেওঁ লগতে মৃতকৰ পৰিয়ালৰ যিকোনো এগৰাকী সদস্যক অসম শক্তি বিতৰণ কোম্পানী লিমিটেডত ঠিকাভিত্তিত নিয়োগৰ ব্যৱস্থা কৰাৰ কথাও ঘোষণা কৰে।
আনহাতে ৰাইজৰ দাবী অনুসৰি মৃতকৰ পৰিয়াললৈ আগবঢ়োৱা ক্ষতিপূৰণৰ পৰিমাণ বৃদ্ধিৰ বাবে উপায়ুক্তৰ সহযোগত কোম্পানীৰ ঊৰ্ধ্বতন কৰ্তৃপক্ষৰ সৈতে আলোচনা কৰাৰো প্ৰতিশ্ৰুতি প্ৰদান কৰে।
ইফালে এনে দুৰ্ভাগ্যজনক ঘটনা যাতে জিলাখনত পুনৰবাৰ সংঘটিত নহয় তাৰ বাবে ব্যৱ্স্থা ল’বলৈ উপায়ুক্ত পৱিত্ৰ ৰাম খাউণ্ডে বিদ্যুৎ বিভাগক কঠোৰ নিৰ্দেশ দিয়াৰ লগতে ঘটনাত সংযম ৰক্ষা কৰা বাবে ৰাইজক ধন্যবাদ জ্ঞাপন কৰে আৰু প্ৰকৃত দোষীক শাস্তি বিহাৰ স্বাৰ্থত তদন্ত প্ৰক্ৰিয়াত সহযোগিতা আগবঢ়াবলৈ সংশ্লিষ্ট সকলোলৈকে আহ্বান জনায়।
