প্ৰতিদিনে টেটুলৈকে মদ খাই ঘৰলৈ আহে স্বামী। মদ খাই আহি অশান্তিৰ পৰিৱেশৰ সৃষ্টি কৰে ঘৰত। মদৰ নিচাত পত্নীৰ ওপৰত চলাই নানান অত্যাচাৰ। কেৱল এয়াই নহয়, মদ খাবলৈ জোৰ-জুলুম কৰি লৈ যায় পত্নীৰ সাচতীয়া টকা। সদায় সদায় কিমান আৰু এই অশান্তি সহ্য কৰিব পত্নীয়ে। যাৰ বাবে স্বামীক মদ খাবলৈ টকা দিয়াত অস্বীকাৰ কৰিলে পত্নীয়ে। পত্নীয়ে টকা নিদিয়াৰ বাবেই প্ৰেছাৰ কুকাৰেৰে পত্নীৰ মূৰত আঘাত স্বামীৰ। স্বামীৰ প্ৰহাৰত প্ৰাণ গ’ল এইগৰাকী মহিলাৰ।
উত্তৰ প্ৰদেশৰ কৌসম্বিত সংঘটিত হৈছে এই কৰুণ ঘটনা। আৰক্ষীৰ মতে, হত্যাকাণ্ডৰ পিছতেই পলাতক হৈ আছে অভিযুক্ত। হত্যাকাৰী স্বামীক গ্ৰেপ্তাৰৰ বাবে অনুসন্ধান চলাই আছে উত্তৰ প্ৰদেশ আৰক্ষীয়ে।
আৰক্ষীৰ তথ্য অনুসৰি শুকুৰবাৰে সংঘটিত হয় এই ঘটনা। উত্তৰ প্ৰদেশৰ কৌসম্বী জিলাৰ কুন্দ্ৰাৱী গাঁৱৰ বাসিন্দা পাটালি নামৰ অভিযুক্ত ব্যক্তিজন। পাটালিয়ে প্ৰায় প্ৰতিদিনেই মদ খাইছিল। মদ খোৱাৰ বাবে পত্নীৰ লগত কাজিয়া তথা অশান্তিৰ সৃষ্টি হৈ আছিল দীৰ্ঘদিন ধৰি।
যোৱা শুকুৰবাৰে কৰ্মস্থলীৰ পৰা ঘৰলৈ উভতি অহাৰ পিছত তেওঁ পত্নীৰ পৰা মদ কিনিবলৈ টকা বিচাৰিছিল। কিন্তু তেওঁৰ পত্নী মীনা দেৱীয়ে ধন দিবলৈ অস্বীকাৰ কৰে।
এই সন্দৰ্ভত দম্পতীহালে তৰ্ক কৰিবলৈ ধৰিলে। খঙত অভিযুক্ত স্বামীয়ে হঠাৎ প্ৰেচাৰ কুকাৰেৰে পত্নীৰ মূৰত প্ৰহাৰ কৰিবলৈ ধৰিলে। ইয়াৰ পিছতেই মহিলাগৰাকীৰ থিতাতে মৃত্যু হয়। ইয়াৰ পিছতে অভিযুক্তই পলায়ন কৰে।
পিছদিনা অৰ্থাৎ শনিবাৰে মৃত মহিলাগৰাকীৰ ভাতৃ আহি দেখে যে ঘৰৰ ভিতৰত ৰক্তাক্ত অৱস্থাত মহিলাগৰাকীৰ মৃতদেহ পৰি আছে।
ইয়াৰ পিছতে তেওঁ আৰক্ষীক অভিযোগ দিয়ে মহিলাগৰাকীৰ ভাতৃয়ে। গোচৰ ৰুজু কৰি অভিযুক্তক বিচাৰি উলিয়াবলৈ আৰক্ষীয়ে তালাচী অভিযান আৰম্ভ কৰিছে।
