ধনৰ বিনিময়ত মেট্ৰিক অনুত্তীৰ্ণ ছাত্ৰ-ছাত্ৰীক জাল মাৰ্কচিট আৰু চাৰ্টিফিকেট যোগান ধৰা এটা বৃহৎ চক্ৰ উৎখাত কৰিবলৈ সক্ষম হৈছে বিশ্বনাথ আৰক্ষী।
উল্লেখ্য যে কিছুদিন পূৰ্বে চেবাই সংবাদ মাধ্যমৰ যোগেদি ৰাজ্যৰ কেইবাখনো জিলাৰ লগতে বিশ্বনাথতো ভুৱা মাৰ্কচিট আৰু চাৰ্টিফিকেট যোগান ধৰাৰ বৃহৎ চক্ৰ সক্ৰিয় হৈ থকাৰ কথা প্ৰকাশ কৰিছিল।
ইয়াৰ পিছত বিশ্বনাথ আৰক্ষীয়ে ইয়াৰ বিৰুদ্ধে অভিযান চলাই এই বৃহৎ চক্ৰটোক উৎখাত কৰিবলৈ সক্ষম হয়।
অভিযানৰ অন্তৰালত নিৰ্মল গোৱালা (বালিপুখুৰী), ৰোহিত গুপ্তা (কোচগাঁও) আৰু এজন প্ৰায় ১৭ বছৰ বয়সীয়া কিশোৰক গ্ৰেপ্তাৰ কৰে। এই সকলোবোৰ কথা বৃহস্পতিবাৰে সংবাদ মাধ্যমক জনাই জিলাখনৰ আৰক্ষী অধীক্ষক ৰাকেশ ৰোশনে।
ইতিমধ্যে কিশোৰগৰাকীক যোৰহাটস্থিত আৰক্ষীৰ বিশেষ শাখালৈ প্ৰেৰণ কৰা হৈছে বুলি জানিবলৈ দিছে বিশ্বনাথ আৰক্ষীয়ে।
উল্লেখ্য যে চক্ৰটোৰ সৈতে SEBA ৰ কৰ্মচাৰী জড়িত আছে নেকি বুলি সোধা প্ৰশ্নৰ উত্তৰত স্পষ্টকে একো উল্লেখ নকৰিলেও বিষয়টো গুৰুত্ব সহকাৰে লৈ অনুসন্ধান অব্যাহত ৰখা বুলিও জানিবলৈ দিয়ে আৰক্ষী অধীক্ষক গৰাকীয়ে।
ঘটনাৰ তদন্তৰ পাছত এই জালিয়াতি চক্ৰৰ সৈতে জড়িত বহু লোকৰ নাম পোহৰলৈ আহিব যে সেইয়া নিশ্চিত হৈ পৰিছে সচেতন মহল।
