দেওবাৰে নিশা উত্তৰ গুৱাহাটীৰ ভেটামুখত সংঘটিত হৈছে এই চাঞ্চল্যকৰ হত্যাকাণ্ড। অঞ্চলটোৰ এটা ঘৰৰ কোঠাৰ ভিতৰত উদ্ধাৰ হৈছে এগৰাকী যুৱতীৰ মৃতদেহ। মৃত যুৱতীগৰাকীক হাচিনা বেগম ওৰফে আচমিনা খাতুন বুলি চিনাক্ত কৰা হৈছে।
উত্তৰ গুৱাহাটীৰ ভেটামুখৰ আনিচা ফাৰুকী নামৰ মহিলাগৰাকীৰ ভাৰাঘৰত বাস কৰিছিল হাচিনা বেগম নামৰ এই ১৮ বছৰীয়া যুৱতীগৰাকীয়ে।
আজি মৃতদেহ উদ্ধাৰৰ সময়ৰ দৃশ্য প্ৰকাশ পোৱাৰ পিছত যুৱতীগৰাকীক বিচনাৰ খুৰাৰে হেঁচি দুৰ্বৃত্তই নিৰ্মমভাৱে হত্যা কৰে বুলি নিশ্চিত হোৱা গৈছে। আনহাতে হত্যাৰ পাছত হত্যাকাৰীয়ে খিৰিকিৰে পলায়ন কৰে বুলি জানিব পৰা গৈছে।
মৃত হাচিনাই উত্তৰ গুৱাহাটীত এটা মিঠাই কোম্পানীত চাকৰি কৰি আছিল। হাচিনাৰ ঘৰ নগাঁৱৰ জুৰীয়াৰ সোণাইপাৰা গাঁৱত বুলি জানিব পৰা গৈছে।
ইফালে এই হত্যাকাণ্ডৰ সৈতে সাঙোৰ খাইছে দুজনকৈ যুৱকৰ নাম। যুৱতীগৰাকীৰ পৰিয়ালৰ অভিযোগ অনুসৰি উত্তৰপ্ৰদেশৰ কানপুৰৰ আনন্দ ওৰফে পিকে নামৰ যুৱকজনে এই হত্যাকাণ্ড সংঘটিত কৰিছে।
অভিযোগ অনুসৰি উত্তৰ প্ৰদেশৰ আনন্দই যুৱতীগৰাকীৰ সৈতে ৰাখিছিল একপক্ষীয় প্ৰেমৰ সম্পৰ্ক। আনন্দে যুৱতীগৰাকীক কামৰ প্ৰলোভনেৰে কেইবাবাৰো বহিঃ ৰাজ্যলৈ লৈ গৈছিল বুলি জানিব পৰা গৈছে।
যুৱতীগৰাকীক তেওঁ বিয়াৰ বাবে জোৰ কৰাৰো অভিযোগ উঠিছে। কিছুদিনৰ আগলৈ পুনেত কৰ্মৰত যুৱতীগৰাকীয়ে তাৰ পৰা অসমলৈ পলায়ন কৰিছিল বুলিও জানিব পৰা গৈছে। পুনেৰ পৰা আহি তেওঁ উত্তৰ গুৱাহাটীত কাম কৰিবলৈ লৈছিল।
আনপিনে, বৰপেটাৰ চফিকুল নামৰ এজন যুৱকৰ সৈতে আচমিনাৰ প্ৰেমৰ সম্পৰ্ক আছিল। চফিকুলে যুৱতীগৰাকীক এটা মোবাইল ফোনও উপহাৰ দিছিল বুলি জানিব পৰা গৈছে।
ইফালে হত্যাকাণ্ডৰ পাছতেই আৰক্ষী তথা দণ্ডাধীশ উপস্থিত হৈ স্নিফাৰ ডগৰ সহায়ত ঘটনাস্থলীত তদন্ত কৰে। এই ঘটনা সন্দৰ্ভত আৰক্ষীয়ে কেইবাজনো যুৱকক আটক কৰি সোধা-পোছা অব্যাহত ৰাখিছে।
কিন্তু কিহৰ বাবে এই হত্যাকাণ্ড, পৰকীয়া প্ৰেম নে আন কিবা, সেয়া তদন্তত হে প্ৰকাশ পাব।
