শিৱসাগৰত আজি এক কৰুণ ঘটনা সংঘটিত হয়। এই কৰুণ ঘটনাত মৃত্যুক আঁকোৱালি ল’ব লগীয়া হয় একেটা পৰিয়ালৰ দুজনকৈ সদস্যই। ঘটনাটোত মৃত্যুক আঁকোৱালি লোৱা ব্যক্তি দুগৰাকীক পিতৃ বাণীকান্ত বৰা আৰু পুত্ৰ পাৰ্থপ্ৰতিম বৰা(২০) বুলি চিনাক্ত কৰা হৈছে।
আজি দিনৰ ভাগত দুয়ো দিখৌ নৈত গা ধুবলৈ যাওঁতে এই ঘটনা সংঘটিত হয়। প্ৰথম অৱস্থাত পুত্ৰ পাৰ্থপ্ৰতিম বৰাই নৈত গা ধুবলৈ যাওঁতে দিখৌ নৈৰ বাঢ়নী পানীয়ে পাৰ্থপ্ৰতিমক উটোৱাই নিয়ে।
ফলত নিজৰ পুত্ৰক বচাবলৈ যাওঁতে পিতৃ বাণীকান্ত বৰাকো দিখৌ নৈৰ বাঢ়নী পানীয়ে উটুৱাই নিয়ে। শিৱসাগৰ নগৰৰ সমীপৱৰ্তী মেটেকা পানীচুক গাঁৱত সংঘটিত হয় এই ঘটনা।
ইতিমধ্যে এছ ডি আৰ এফে পিতা-পুত্ৰ দুয়োৰে মৃতদেহ বিচাৰি উদ্ধাৰ অভিযান চলাই আছে। বৰ্তমানলৈকে উদ্ধাৰকাৰী দলে পিতৃ বাণীকান্ত বৰাৰ মৃতদেহ উদ্ধাৰ কৰিবলৈ সক্ষম হোৱাৰ বিপৰীতে পুত্ৰ পাৰ্থপ্ৰতিম বৰাৰ মৃতদেহ বাতৰি লিখা পৰলৈকে উদ্ধাৰ কৰিবলৈ সক্ষম হোৱা নাই।
নিহত বাণীকান্ত বৰা বগীদল পাঁচআলি পানী যোগান আঁচনিৰ চতুৰ্থবৰ্গৰ কৰ্মচাৰী আছিল বুলি জানিব পৰা গৈছে। আনহাতে নৱবৰ্ষৰ প্ৰাকক্ষণত এনেদৰে একেটা পৰিয়ালৰ দুজনকৈ সদস্যই মৃত্যুক আঁকোৱালি লোৱা ঘটনাই অঞ্চলটোত এক শোকাকুল পৰিৱেশৰ সৃষ্টি কৰিছে।