শাৰদীয় উৎসৱৰ প্ৰাক নিশা এক বিধ্বংসী অগ্নিকাণ্ডত ডিমা হাচাও জিলাৰ মহকুমা সদৰ মাইবাঙত চাৰিখনকৈ দোকান জাহ গ’ল। ক্ষয়ক্ষতিৰ পৰিমাণ কেইবা লক্ষাধিক হ’ব।
অৱশ্যে অগ্নিকাণ্ড কিদৰে সংঘটিত হ’ল তাৰ প্ৰকৃত কাৰণ জানিব পৰা হোৱা নাই। মাইবাং চহৰৰ ডামাডি হাওয়াৰ এলেকাৰ জলসিঞ্চন বিভাগৰ পৰিদৰ্শন বাঙল’ৰ নিলগত এই অগ্নিকাণ্ড সংঘটিত হয়।
প্ৰত্যক্ষদৰ্শীয়ে দিয়া তথ্য অনুসৰি নিশা প্ৰায় এক মান বজাত এই অগ্নিকাণ্ডৰ সূত্ৰপাত হয়। জুইত জাহ যোৱা চাৰিখন দোকানৰ ভিতৰত আছিল দুলাল মজুমদাৰৰ গ্লচাৰি দোকান, বচিৰ আহমেদৰ টায়াৰৰ দোকান, পান্না দাসৰ বাইক-অট’ৰিক্সাৰ ৱাৰ্কশ্বপ আৰু সুপ্ৰিয়া সৰকাৰৰ চাহৰ দোকান।
ইতিমধ্যে মাইবাঙ আৰক্ষী ঘটনাস্থলীত উপস্থিত হৈ অগ্নিকাণ্ডৰ ঘটনাৰ প্ৰাথমিক তদন্ত কৰিছে। আন এক সূত্ৰৰ পৰা জানিব পৰা মতে অগ্নিকাণ্ডত জাহ যোৱা এখন দোকানত একাধিক অবৈধ চিলিণ্ডাৰ মজুত আছিল আৰু এই অবৈধ চিলিণ্ডাৰৰ বিস্ফোৰণৰ ফলতে জুইয়ে অতি কম সময়ৰ ভিতৰতে গ্ৰাস কৰি পেলায়।
