“মই এতিয়া বহুত সুখী যে মোৰ ছাত্ৰ এতিয়া ইমান ডাঙৰ পদত আছে”, বৃদ্ধাৱাসত থকা এগৰাকী আইতা
বৰ্তমান গুৱাহাটীৰ হাতীগাঁৱৰ সিজুবাৰীস্থিত মাদাৰ্ছ অ’ল্ড এইজ হ’মত জীৱন পাৰ কৰা এগৰাকী স্বামীহীনা, সন্তানহীনা বৃদ্ধাই আজি গৰ্ব প্ৰকাশ কৰিলে এচমকা অতীতক সুঁৱৰি।
গুৱাহাটীৰ উল্লেখযোগ্য বৃদ্ধাৱাসটোত আজি বিভিন্ন ব্যক্তি, স্বেচ্ছাসেৱী সংগঠনৰ উপস্থিতিত বিশ্ব মাতৃ দিৱস উদযাপন কৰা হৈছিল।
অনুষ্ঠানটোৰ মাজতে নৰ্থ-ইষ্ট নাওৰ আগত প্ৰকাশ কৰে বৃদ্ধাৱাসটোৰ এগৰাকী আৱাসী বীণাপাণি দেৱীয়ে নিজৰ এচমকা অতীত।
নিচেই কম বয়সতে বিয়া, তাৰ পিছত তিনি মাহৰ পিছতে স্বামীৰ মৃত্যু। নিঃসন্তান বীণাপাণি দেৱী পেচাত শিক্ষয়িত্ৰী আছিল। ৰঙিয়া মহকুমাৰ অন্তৰ্গত চেপ্তি প্ৰাথমিক বিদ্যালয়ত শিক্ষকতা কৰোঁতে পঢ়াইছিল বৰ্তমান ৰাজ্যৰ আৰক্ষী সঞ্চালক প্ৰধান কুলধৰ শইকীয়াক।
“কুলধৰ শইকীয়াক মই চেপ্তি প্ৰাথমিক বিদ্যালয়ত পঢ়াইছিলো। মই এতিয়া বহুত সুখী মোৰে ছাত্ৰ এতিয়া ইমান ডাঙৰ পদত আছে”, গৰ্বেৰে সুঁৱৰি আইতাগৰাকীয়ে কয়।
অৱশ্যে সঠিক সময়টো বৰ্তমান মনলৈ আনিব পৰা নাই বুলি জনালে আইতাই। কিন্তু স্পষ্টকৈ মনত আছে আৰক্ষী সঞ্চালক প্ৰধানগৰাকীক পঢ়োৱাৰ কথা।
“কুলধৰৰ দেউতাক মুক্তাৰাম শইকীয়া ৰঙিয়া হাইস্কুলৰ শিক্ষক আছিল। তেওঁৰ যিকেইগৰাকী ল’ৰা-ছোৱালী আছিল তেওঁলোকক ময়েই পঢ়োৱা। তেওঁলোক পঢ়াত বহুত ভাল আছিল, সবেই প্ৰাথমিক বৃত্তি পাইছিল।” আন্তঃৰাষ্ট্ৰীয় মাতৃ দিৱসত আইতাই আছুতীয়া সাক্ষাৎকাৰত এইদৰে কয়।
ভতিজাকহঁতৰ লগত থকা বীণাপাণি দেৱীয়ে দুৰ্ব্যৱহাৰ সহিব নোৱাৰি এদিন মাদাৰ্ছ অ’ল্ড এইজ হ’ম নামৰ বৃদ্ধাৱাসটোত আশ্ৰয় ল’ব লগীয়া হয়, সেয়া আছিল ২০১৬ চনৰ প্ৰথম ভাগৰে ঘটনা।
কিন্তু ২০১৭-ৰ মাজত ভতিজাকহঁতে আহি বৃদ্ধাৱাসৰ পৰা লৈ যায়। কিন্তু আকৌ কাজিয়া কৰি খেদাই দিয়ে।
মাদাৰ অ’ল্ড এইজ হ’ম কৰ্তৃপক্ষই জানিবলৈ দিয়া মতে বৰ্তমান আইতাৰ ভতিজাকসকলে তেওঁৰ সা-সম্পত্তি সকলো হস্তক্ষেপ কৰিছে।