বিদ্যালয়ৰ ভিতৰতে শিক্ষয়িত্ৰীক ধৰ্ষণৰ অভিযোগ উঠিছে। ব্যক্তিগত বিদ্যালয় এখনৰ মালিকে এগৰাকী ৩২ বছৰীয়া শিক্ষয়িত্ৰীক ধৰ্ষণ কৰাৰ অভিযোগ উঠিছে। শেহতীয়াকৈ এই কাণ্ড সংঘটিত হৈছে গ্ৰেটাৰ নয়ডাত।
বুধবাৰে আৰক্ষীয়ে এই ঘটনাৰ কথা সদৰী কৰে। অভিযুক্ত বিদ্যালয়ৰ মালিকৰ বিৰুদ্ধে এফআইআৰ দাখিল কৰা হৈছে। আৰক্ষীয়ে তেওঁক গ্ৰেপ্তাৰ কৰা বুলি জানিবলৈ দিয়ে। আদালতত হাজিৰ কৰোৱাৰ পিছত অভিযুক্তক জেললৈ প্ৰেৰণৰ নিৰ্দেশ দিয়ে ন্যায়াধীশে।
যৌন নিৰ্যাতনৰ বলি হোৱা শিক্ষয়িত্ৰীগৰাকীয়ে অভিযোগ কৰে যে চলিত বৰ্ষৰ ফেব্ৰুৱাৰী মাহত বিদ্যালয়ৰ মালিকে প্ৰথমবাৰৰ বাবে তেওঁক ধৰ্ষণ কৰিছিল। অভিযুক্তই সেই ঘটনাৰ ভিডিঅ’ও বনাইছিল।
লগতে পঢ়কঃ অৱশেষত পত্নীৰ নিৰ্যাতনৰ পৰা মুক্ত ‘গব্বৰ’! শিখৰ ধাৱনৰ বিবাহ বিচ্ছেদত আদালতৰ ছীল মোহৰ
অভিযোগ অনুসৰি, ভিডিঅ’টো দেখুৱাই প্ৰায়ে শিক্ষয়িত্ৰীগৰাকীৰ সৈতে বলপূৰ্বক যৌন সম্পৰ্ক স্থাপন কৰিছিল। এইদৰেই যোৱা কেইমাহমানৰ ভিতৰত শিক্ষয়িত্ৰীগৰাকীক কেইবাবাৰো নিৰ্যাতন কৰা হৈছিল।
এই সন্দৰ্ভত এজন আৰক্ষী বিষয়াই কয়, “শিক্ষয়িত্ৰীগৰাকী বিদ্যালয়ত কৰ্তব্যৰত অৱস্থাত থকাৰ সময়ত অভিযুক্তই তেওঁক জৰুৰীকালীন কামৰ বাবে নিজৰ কেবিনলৈ মাতিছিল। আৰু তেওঁক যৌন নিৰ্যাতন চলাইছিল।”
বাৰে বাৰে নিৰ্যাতনৰ বলি হোৱাৰ ফলত হতাশাত ভুগিছিল শিক্ষয়িত্ৰীগৰাকী। শেহতীয়াকৈ তেওঁ স্বামীক এই সমগ্ৰ ঘটনাৰ বিষয়ে অৱগত কৰিছিল। যোৱা সপ্তাহত শিক্ষয়িত্ৰীগৰাকী আৰু তেওঁৰ স্বামীয়ে বিদ্যালয়ৰ মালিকৰ বিৰুদ্ধে স্থানীয় আৰক্ষী থানাত অভিযোগ দাখিল কৰে।
লগতে পঢ়কঃ বৰপেটাৰোডত ভয়াবহ পথ দুৰ্ঘটনাত নিহত ২ জন যুৱক; গুৰুতৰভাৱে আহত ৩জন
উক্ত অভিযোগৰ ভিত্তিত আৰক্ষীয়ে ভাৰতীয় দণ্ডবিধিৰ ৩৭৬ আৰু ৫০৭ ধাৰাত গোচৰ ৰুজু কৰি অভিযুক্তক সন্ধান আৰম্ভ কৰে। মঙলবাৰে চুহাৰপুৰ আণ্ডাৰপাছৰ সমীপত আৰক্ষীয়ে অভিযুক্তক গ্ৰেপ্তাৰ কৰে।
