বিজেপি চিৰিয়েল কিলাৰ, বহু ৰাজ্যত বহু দলক হত্যা কৰিছেঃ কেজৰিৱাল

দিল্লীত মহাৰাষ্ট্ৰ দৰেই ঘটনাৰ পুনৰাবৃত্তি ঘটিব বুলি আশংকা কৰি থকাৰ সময়তে আজি কেজৰিৱালে বিজেপিক ক্ষুৰধাৰ সমালোচনা কৰে।কেজৰিৱালে বিজেপিক চিৰিয়েল কিলাৰৰ সৈতে তুলনা কৰি দলটোত তুলাধুনা দিলে। বিজেপিৰ বিৰুদ্ধে আপৰ বিধায়কসকলক হৰ্ছ ট্ৰেডিং কৰাৰ অভিযোগ উত্থাপিত হৈ অহাৰ সময়তে কেজৰিৱালে বিজেপিৰ বিৰুদ্ধে সৰব হৈ পৰে।কেজৰিৱালে কয়, “বিজেপিয়ে বহু কেইখন ৰাজ্যৰ চৰকাৰক হত্যা কৰিছে। এইবাৰ তেওঁলোকে দিল্লীৰ ফালে হাত মেলিছে।

উল্লেখ্য বৃহস্পতিবাৰে কেজৰিৱালে দাবী কৰিছিল যে আপৰ কেইবাজনো বিধায়কক বিজেপিত যোগদান কৰিবলৈ কমেও ২০ কোটি টকাৰ প্ৰস্তাৱ দিয়া হৈছে। আপৰ সাতজন বিধায়ক ইতিমধ্যে দিল্লীৰ পৰা ‘নিৰুদ্দেশ’ হৈছে। এনে পৰিস্থিতিত, কেজৰিৱালে অহা সোমবাৰে আস্থা ভোট অনুষ্ঠিত কৰাৰ সম্ভাৱনা আছে।

দিল্লীত এক বিশেষ অধিৱেশনত ভাষণ দি কেজৰিৱালে কয়, “মই আস্থাৰ ভোট ল’ব বিচাৰো। মই সকলোকে দেখুৱাব লাগিব যে এজনো আপ বিধায়কে মোক এৰি যোৱা নাই। বিজেপিয়ে কাকো ভাঙিব নোৱাৰিলে। মনীষ চিছোদিয়াৰ বিৰুদ্ধে আবকাৰী গোচৰত তালাচী চলোৱা সন্দৰ্ভত কেজৰিৱালে কয় “মই মনীষৰ ঘৰৰ পৰা ২৫ পইচাও পোৱা নাছিলো। বিজেপিয়ে এতিয়াও তেওঁক ২০ কোটি টকাৰ বিনিময়ত আপ এৰি যাবলৈ প্ৰস্তাৱ দিছিল। যিহেতু মনীষে প্ৰস্তাৱটোত সন্মত হোৱা নাই, বিজেপিয়ে আন বিধায়কসকলৰ ফালে হাত মেলিছে। “

আজি বিজেপিৰ ‘অপাৰেচন লোটাছ’ সম্পৰ্কীয় বিষয়বোৰ আলোচনা কৰিবলৈ দিল্লী বিধান সভাৰ এক বিশেষ অধিৱেশন আহ্বান কৰা হৈছিল। আপৰ মুৰব্বীগৰাকীয়ে কয় যে বিজেপিয়ে কেইবাখনো ৰাজ্যত চৰকাৰ উৎখাত কৰিছে। এইবাৰ তেওঁলোকৰ লক্ষ্য হৈছে দিল্লী চৰকাৰক উৎখাত কৰা।

দৰাচলতে, বিজেপি চিৰিয়েল কিলাৰৰ দৰে। তেওঁলোকে বিভিন্ন ৰাজ্যৰ চৰকাৰক হত্যা কৰি আছে। বিজেপিয়ে একে পদ্ধতিৰে প্ৰতিখন ৰাজ্যতে চৰকাৰ গঠন কৰিবলৈ গৈ আছে। কেজৰিৱালে লগতে কয় যে যোৱা কেইবছৰমানত বিজেপিয়ে ধনৰ বিনিময়ত ২৭৭ জন বিধায়ক নিজৰ পিনে আনিছে।কেজৰিৱালে এইবুলিও প্ৰশ্ন কৰে যে বিজেপিয়ে বিধায়ক ক্ৰয় কৰিবলৈ ইমান টকা ক’ৰ পৰা পাইছে।