মাত্ৰ সাত বছৰত ৩০ টাকৈ নাবালিকাক ধৰ্ষণ কৰি হত্যা কৰা হৈছিল! দিল্লীৰ ৰোহিনী আদালতে দোষী সাব্যস্ত হোৱাৰ পাছত সেই যুৱকক যাৱজ্জীৱন কাৰাদণ্ডৰ শাস্তি প্ৰদান কৰিছে। বুধবাৰে দিল্লী আদালতে এই ৰায় দিয়ে। চলিত মাহতে যুৱকক আদালতত দোষী সাব্যস্ত কৰা হৈছিল। দিল্লী আৰক্ষীয়ে তেওঁৰ বাবে সৰ্বোচ্চ শাস্তি বিচাৰিছিল। আদালতেও সেইমতেই ৰায় দিয়ে।
মাত্ৰ ১৮ বছৰ বয়সত ৰবিন্দৰ ড্ৰাগছৰ প্ৰতি আসক্ত হৈ পৰিছিল। কামৰ পিছত সন্ধিয়া সময়বোৰ পৰ্ণগ্ৰাফী চাই পাৰ কৰিছিল। বস্তিত কিছু সময় কটোৱাৰ পিছত মাজনিশাৰ পৰা আৰম্ভ হৈছিল তাৰ বিকৃত অভিযান!
কেতিয়াবা ১০ টকা বা চকলেটৰ প্ৰলোভনেৰে দূৰৈৰ বস্তিৰ পৰা নাবালিকাক অপহৰণ কৰিছিল। তাৰ পিছত চলাইছিল যৌন নিৰ্যাতন। কেতিয়াবা ধৰ্ষণ কৰি হত্যাও কৰিছিল ৰবিন্দৰে। শেহতীয়াকৈ আৰক্ষীয়ে তাৰ অপৰাধনামা ফাদিল কৰিছিল।
এটি ৬ বছৰীয়া শিশুকন্যাৰ মৃত্যুৰ তদন্তৰ পিছতে আৰক্ষীয়ে গম পাইছিল হত্যাকাৰী যুৱকজনৰ এই জঘণ্য কাহিনী। ২০১৫ চনত আৰক্ষীৰ জালত ধৰা পৰিছিল ২৪ বছৰীয়া ৰবিন্দৰ। তাৰ পিছত তাক দিল্লীৰ তিহাৰ জেলত বন্দী কৰি ৰখা হৈছিল।
উক্ত গোচৰটো ৮ বছৰ ধৰি চলি থকাৰ পাছত যোৱা ৬ মে’ত আদালতে ৰবিন্দৰক দোষী সাব্যস্ত কৰিছিল।
আৰক্ষীৰ সূত্ৰই জানিবলৈ দিছিল যে, ৰবিন্দৰে আগতে ৬ৰ পৰা ১২ বছৰৰ ভিতৰৰ নাবালিকাসকলক লক্ষ্য কৰি লৈছিল। উত্তৰ প্ৰদেশৰ কাশগঞ্জৰ পৰা সি ৰাজমিস্ত্ৰীৰ কাম কৰিবলৈ দিল্লীলৈ আহিছিল। ১৮ বছৰ বয়সৰ পৰাই সি ধৰ্ষণৰ দৰে অপৰাধ সংঘটিত কৰিছিল।
মুঠতে সি ৭ বছৰত ৩০ জনী নাবালিকাক ধৰ্ষণ কৰি হত্যা কৰাৰ কথা স্বীকাৰ কৰে। ৰবিন্দৰে কেতিয়াবা ৪০ কিলোমিটাৰ খোজ কাঢ়ি গৈও নাবালিকাক অপহৰণ কৰিছিল।
দীৰ্ঘদিনীয়া বিচাৰৰ অন্তত ৰবিন্দৰক দোষী সাব্যস্ত কৰা হয়। যোৱা সপ্তাহত তেওঁৰ শাস্তি ঘোষণা হ’বলগীয়া আছিল। কিন্তু অপৰাধীৰ সম্পত্তিৰ সবিশেষ নথকাৰ বাবে এই শাস্তি ঘোষণা কৰা নহ’ল। অৱশেষত বুধবাৰে এই শাস্তি ঘোষণা কৰে আদালতে। বিচাৰৰ সময়ত দিল্লী আৰক্ষীয়ে ৰবিন্দৰক মৃত্যুদণ্ড দিয়াৰ বাবে অনুৰোধ জনাইছিল।
