আজি যোৰহাট জিলাৰ তিতাবৰত তীব্ৰবেগী ৰে’লৰ খুন্দাত এটা হাতীৰ মৃত্যু হৈছে। খাদ্যৰ সন্ধানত লোকালয়লৈ ওলাই অহা হাতীটোৱে ৰে’ললাইন পাৰ হ’ব খোজোতেই উজনিমুৱা ইণ্টাৰচিটি এক্সপ্ৰেছ ৰে’লখন উক্ত ঠাই পায় আৰু হাতীটোক মহতিয়াই নিয়ে। ফলত হাতীটোৱে থিতাতে কৰুণ মৃত্যুক আকোৱালি ল’বলগীয়া হয়।
ইফালে হাতীটোক খুন্দিওৱাৰ পাছতে ৰে’লখন লাইনচ্যুত হয় আৰু যাৰ ফলত এতিয়া সমগ্ৰ উজনি অসমৰ ৰে’লৰ চলাচল বন্ধ হৈ পৰিছে। বৰ্তমান ঘটনাস্থলত ৰে’ল বিভাগৰ কৰ্মচাৰী উপস্থিত হৈ বিষয়টো নিৰীক্ষণ কৰি থকাৰ লগতে উদ্ধাৰৰ বাবে চষ্টা চলাই আছে।
আনহাতে এতিয়াও দুৰ্ঘটনা সংঘটিত হোৱা ঠাইখিনিত এটা হাতীৰ জাকে অৱস্থান গ্ৰহণ কৰি আছে বুলি জানিব পৰা গৈছে।
হাতীৰ এই কৰুণ মৃত্যুক সহজভাৱে ল’ব পৰা নাই স্থানীয় ৰাইজ তথা প্ৰকৃতিপ্ৰেমী সকলে। সকলোৱে একমুখে বনবিভাগৰ অকৰ্মণ্যতাক গৰিহণা দিছে। উল্লেখযোগ্য যে যোৱা কিছু দিনৰ পৰা ৰাজ্যখনৰ বিভিন্ন ঠাইত নিয়মীয়াকৈ বনৰীয়া হাতীৰ মৃত্যু হৈ আহিছে। হাতী-মানুহৰ সংঘাতত ক’ৰবাত যদি হাতীৰ মৃত্যু হৈছে, ক’ৰবাত মানুহৰ।
উল্লেখ্য যে বিয়াগোম বন বিভাগে হাতীৰ অৱস্থান আৰু গতিবিধিক নিৰীক্ষণত ৰখাৰ কোনো চেষ্টা তথা ব্যৱস্থা গ্ৰহণ কৰা নাই। যাৰ বাবে ৰে’লৰ খুন্দাতেই বিগত এবছৰত কেইবাটাও হাতীৰ মৃত্যু হৈছে।
