গোৱালপাৰা জিলাৰ টুকুৰা মধ্য ইংৰাজী বিদ্যালয়ৰ সহকাৰী শিক্ষক তথা পাইকান পূজাৰীপাৰাৰ নিবাসী প্ৰয়াত দূৰ্গা চক্ৰৱৰ্তী আৰু প্ৰয়াত লতিকা চক্ৰৱৰ্তীৰ সন্তান চন্দন চক্ৰৱৰ্তী লৈ এই বেলি ৰাজ্য চৰকাৰৰ শিক্ষা বিভাগে ৰাজ্যিক কৃতী শিক্ষকৰ বঁটা প্ৰদানৰ বাবে নিৰ্বাচিত কৰে৷
টুকুৰা মধ্য ইংৰাজী বিদ্যালয়ৰ সহকাৰী শিক্ষক চন্দন চক্ৰৱৰ্তীক এই বঁটা বাবে নিৰ্বাচিত হোৱা খবৰে জিলা খনৰ লগতে কৃষ্ণাইবাসী ৰাইজে উৎফুল্লিত হৈ পৰে ৷
২০০১ চনত টুকুৰা মধ্য ইংৰাজী বিদ্যালয়ত শিক্ষক হিচাবে নিযুক্তি লাভ কৰা চন্দন চক্ৰৱৰ্তীয়ে বিগত দিনবোৰত শিক্ষাৰ ক্ষেত্ৰত বিদ্যালয় খনৰ লগতে অঞ্চলটোত এক বিশেষ ভুমিকা গ্ৰহণ কৰি আহিছিল ৷
অকল শিক্ষাই নহয় সাহিত্য-সংস্কৃতিৰ ক্ষেত্ৰতো চন্দন চক্ৰৱৰ্তীৰ আছে এক বিশেষ অৰিহনা।একেধাৰে কবি, নাট্যকাৰ,পৰিচালক, অভিনেতা হিচাবে গোৱালপাৰা জিলাতে সু পৰিচিত চন্দন চক্ৰৱৰ্তী ৷
২০১৩ চনত ভাৰতীয় দলিত সাহিত্য একাডেমিয়ে দিল্লীত ড° আম্বেদকাৰ ৰাষ্ট্ৰীয় ফেলশ্বিপ বঁটা, ২০১৮ চনত গোৱালপাৰা জিলা প্ৰশাসন আৰু শিক্ষা বিভাগে জিলাৰ কৃতী শিক্ষক হিচাবে বঁটা প্ৰদান কৰাৰ লগতে ২০১৭ চনত সাংস্কৃতিক মহাসভাই শিৱসাগৰত বিশিষ্ট সমাজ কৰ্মী হিচাবে চন্দন চক্ৰৱৰ্তীক বঁটা প্ৰদান কৰিছিল ৷
উল্লেখ্য যে অহা ৫ ছেপ্তেন্বৰত শিক্ষক দিবসৰ দিনাই গুৱাহাটীৰ কলাক্ষেত্ৰত আয়োজন কৰা এই বিশেষ অনুষ্ঠানত ৰাজ্য চৰকাৰে গোৱালপাৰাৰ চন্দন চক্ৰৱৰ্তীৰ লগতে ৰাজ্যখনৰ কেইবাগৰাকী কৃতী শিক্ষকক এই বঁটা প্ৰদান কৰিব ৷