ভেন্সাৰ শিক্ষানুষ্ঠান প্ৰাদেশিকীকৰণৰ প্ৰতিশ্ৰুতিৰে শাসনলৈ অহা ৰাজ্য চৰকাৰৰ প্ৰভাৱশালী মন্ত্ৰীৰ চূড়ান্ত মিথ্যাচাৰ তথা ভেন্সাৰ শিক্ষকৰ দুৰৱস্থাক কোনো গুৰুত্ব প্ৰদান নকৰাৰ ফলশ্ৰুতিত ৰাজ্যত বৃদ্ধি পাইছে ভেন্সাৰ শিক্ষকৰ মৃত্যুৰ ঘটনা।
বছৰ বছৰ ধৰি বিনা বেতনে মানৱ সম্পদ গঢ় দি অহা ৰাজ্যৰ ভেন্সাৰ শিক্ষক কৰ্মচাৰীসকলক পৰিবৰ্তনকামী চৰকাৰখনেও চূড়ান্তভাবে বঞ্চিত কৰাত খোদ ৰাজ্যিক বিজেপিৰ গৃহ সমষ্টি সৰভোগত বুধবাৰে এগৰাকী শিক্ষকে কৰুণ মৃত্যুক সাৱটি লয়।
৩৫ বছৰে দৰমহাৰ মুখ নেদেখাকৈ মৃত্যুক সাৱটি লোৱা দুৰ্ভগীয়া শিক্ষক গৰাকী হ’ল দেৱান আশ্ৰফ আলী (৫৯) ৷ বৰপেটা জিলাৰ বৰবাৰীঝাৰত ১৯৭৯ চনত স্থাপন কৰা নৱমিলন এম ই বিদ্যালয়খনত ১৯৮৩ চনত শিক্ষক হিচাপে কৰ্মজীৱন আৰম্ভ কৰা আলীয়ে মৃত্যুৰ আগমুহুৰ্তলৈ প্ৰধান শিক্ষক পদত অধিষ্ঠিত আছিল।
প্ৰাদেশিকীকৰণ সন্দৰ্ভত বৰ্তমানৰ ৰাজ্য চৰকাৰখনৰ চূড়ান্ত হেমাহিৰ বাবেই প্ৰধান শিক্ষক গৰাকীয়ে চৰম হতাশাত দিন অতিবাহিত কৰিছিল। অৱশেষত বুধবাৰে বিয়লি প্ৰায় ৩ বজাত নিজ বাসগৃহতে হৃদযন্ত্ৰৰ ক্ৰিয়া বন্ধ হৈ দুৰ্ভগীয়া শিক্ষক গৰাকীৰ মৃত্যু হয়। প্ৰধান শিক্ষক গৰাকীৰ আকস্মিক বিয়োগত অঞ্চলটোত শোকৰ ছাঁ পৰে।
এনেদৰে দৰমহাৰ মুখ নেদেখাকৈয়ে শিক্ষকজনে মৃত্যুক আকোৱালি ল’ব লগীয়া হোৱা ঘটনাক অসম শিক্ষক কৰ্মচাৰী ঐক্যমঞ্চই গভীৰ শোক প্ৰকাশ কৰাৰ লগতে চৰকাৰৰ নিৰ্লিপ্ত ভূমিকাক তীব্ৰ ভাষাৰে গৰিহণা দিয়ে।
এক বিবৃতিত ঐক্যমঞ্চৰ কেন্দ্ৰীয় সমিতিৰ সহকাৰী সম্পাদক প্ৰাঞ্জল কুমাৰ শৰ্মা আৰু বৰপেটা জিলা শিক্ষক কৰ্মচাৰী ঐক্যমঞ্চৰ যুটীয়া সম্পাদক পুলেন্দ্ৰ দাসে জনায় যে, বিধানসভা নিৰ্বাচনৰ সময়ত প্ৰাদেশিকীকৰণৰ প্ৰতিশ্ৰুতি প্ৰদান কৰা সৰ্বানন্দ সোণোৱাল নেতৃত্বাধীন চৰকাৰখনে বিগত প্ৰায় তিনি বছৰ ধৰি শিক্ষানুষ্ঠান প্ৰাদেশিকীকৰণত অযথা বিলম্ব কৰাৰ বাবে মানৱ সম্পদ গঢ় দি অহা ভেন্সাৰ শিক্ষানুষ্ঠানৰ শিক্ষক কৰ্মচাৰীয়ে জীৱনৰ নিৰাপত্তা হেৰুৱাই পেলাইছে।
ইয়াৰ উপৰি পূৰ্বে পাই থকা আৰ্থিক সাহায্যখিনিও এইখন চৰকাৰে কাঢ়ি নিয়াৰ ফলত আৰ্থিক দীনতাত ভেন্সাৰ শিক্ষক কৰ্মচাৰী সকলে মৃত্যুৰ ক্ষণ গণি থকা বুলিও ঐক্যমঞ্চৰ নেতা দুগৰাকীয়ে জনায়।
