বাহ ওস্তাদ বাহ! ৰাহাত ফাতেহ আলী খানৰ এয়া কি ৰূপ; সৰু কথাতে নিজৰ শিষ্যক নিৰ্মম প্ৰহাৰ

দুই দেশৰ শত্ৰুতাৰ কথা নেওচি তেওঁৰ গীতত মোহিত ভাৰত। কাৱালীৰ পৰা বলীউডী গানলৈকে পাকিস্তানী গায়ক ৰাহাত ফতেহ আলী খানৰ জনপ্ৰিয় গীতৰ অভাৱ নাই। কিন্তু ইমান সফলতাই কণ্ঠশিল্পীগৰাকীৰ মূৰত ধৰিলে নেকি? এটা ভিডিঅ’ ভাইৰেল হোৱাৰ পিছত এনে প্ৰশ্নই উত্থাপন হৈছে।

ভাইৰেল ভিডিঅ’টোত এজন যুৱকক গায়কজনে নিৰ্মমভাৱে প্ৰহাৰ কৰি থকা দেখা গৈছে। যুৱকজনে বাৰে বাৰে অনুৰোধ কৰাৰ পিছতো তেওঁ ৰৈ থকা নাই, কোনোমতেই তেওঁৰ খং কমা নাই।

পাকিস্তানী সংবাদ মাধ্যমৰ সূত্ৰ অনুসৰি যুৱকজনে ৰাহাত ফাতেহ আলী খানৰ ঘৰত কাম কৰে। পানীৰ বটল বিচাৰিয়েই নিজৰ কৰ্মচাৰীক নিৰ্দয়ভাৱে প্ৰহাৰ কৰিলে গায়কজনে। এটাৰ পিছত এটাকৈ চৰ মাৰিলে। আনকি জোতা খুলি জোতাৰেও অবিৰতভাৱে প্ৰহাৰ কৰে। পিছত কিছু লোক আহি যুৱকজনক ৰাহাত ফতেহ আলী খানৰ পৰা মুক্ত কৰিবলৈ চেষ্টা কৰে।

লগতে পঢ়কঃ নাইট্ৰজেন গেছ ব্যৱহাৰ কৰি কাৰ্যকৰী মৃত্যুদণ্ড; অন্তিম ২২ মিনিট ধৰি ছটফটাইছিল অপৰাধী!

এই ভিডিঅ’টো ছ’চিয়েল মিডিয়াত ভাইৰেল হোৱাৰ লগে লগে হুলস্থুলৰ সৃষ্টি হয়। নেটিজেনসকলে সমালোচনাৰে ধুমুহাৰ সৃষ্টি কৰিলে। ইয়াৰ পিছত গায়কজন নিজেই স্পষ্টীকৰণ দিবলৈ ওলাই আহিল।

 শনিবাৰে তেওঁ যুৱকজন আৰু তেওঁৰ পিতৃৰ এটা ভিডিঅ’ পোষ্ট কৰে। ভিডিঅ’টোত তেওঁ স্পষ্ট কৰি দিছে, “এয়া ওস্তাদ আৰু তেওঁৰ শিষ্য (সহযোগী)ৰ মাজৰ ব্যক্তিগত বিষয়। সি মোৰ ল’ৰাৰ দৰে। শিক্ষক আৰু ছাত্ৰৰ মাজত এনেকুৱাই সম্পৰ্ক হয়। কোনো ছাত্ৰই যেতিয়া ভাল কাম কৰে তেতিয়া মই তেওঁলোকক মৰম দিওঁ, আৰু যদি তেওঁলোকে কিবা ভুল কৰে তেন্তে মই তেওঁলোকক শাসন কৰি শাস্তি দিওঁ।”

ভিডিঅ’টোত যুৱকজনে ৰাহাত ফতেহ আলী খানৰ এই আচৰণ সম্পৰ্কত স্পষ্ট কৰি দিছে। যুৱকজনে কয়, “তেওঁ মোৰ দেউতাৰ দৰে। মোক  বহুত ভাল পায়। এই ভিডিঅ’টো যিয়ে ভাইৰেল কৰিলে তেওঁ ওস্তাদজীক বদনাম কৰিবলৈ চেষ্টা কৰিছে।”

ভিডিঅ’টোৰ শেষত ৰাহাত ফাতেহ আলী খানেও ক্ষমা বিচৰা দেখা গৈছে।