যি সময়ত কোভিড-১৯ ৰ সংক্ৰমণ হ্ৰাসৰ বাবে চৰকাৰে জাৰি কৰা নীতি-নিৰ্দেশনা ভংগ কৰা এচাম লোকৰ বিৰুদ্ধে আৰক্ষীয়ে কঠোৰ ব্যৱস্থা গ্ৰহণ কৰিবলগা হৈছে তেনে সময়ত যোৰহাট জিলাৰ টীয়কৰ এখন গাঁৱৰ বাসিন্দাসকলে গাঁওখনক কোভিড মুক্ত কৰি ৰাখিবলৈ গ্ৰহণ কৰা সতৰ্কতামূলক ব্যৱস্থাই সকলোৰে দৃষ্টি কাঢ়িছে৷
টীয়ক নগৰৰ পৰা প্ৰায় ৬ কিলোমিটাৰ নিলগত অৱস্থিত এখন নৈপৰীয়া গাঁও হৈছে কাৱৈমাৰী গোঁহাই গাঁও। প্ৰায় চাৰিশ ঘৰ মানুহে বসতি কৰা গাঁওবাসী একগোট হৈ কোভিডৰ বিৰুদ্ধে যি সংগ্ৰাম আৰম্ভ কৰিছে তাৰ বাবেই আজিও কোভিড মুক্ত হৈ আছে গাওঁখন৷
যি সময়ত এই গণ সংক্ৰমণ ৰোধৰ বাবে প্ৰশাসনে নতুন নতুন নীতি নিৰ্দেশনা আনিব লগা হৈছে, মাস্ক পৰিধান নকৰিলে জৰিমনা ভৰিব লগা হৈছে সেই সময়ত এই ভিতৰুৱা গাঁৱখনৰ লোকসকলৰ সজাগতাই এক ইতিবাচক সংকেত কঢ়িয়াইছে৷
উল্লেখযোগ্য যে গাঁওখনত মাস্ক পৰিধানৰ বাবে বিশেষ সজাগতা অনাৰ প্ৰয়াস কৰি গাঁওৰক্ষী বাহিনীয়ে আৰু বিভিন্ন ৰাজহুৱা স্থান, দোকান আদিত সজাগতামূলক পোষ্টাৰ লগোৱাৰ লগতে গাঁওখনৰ প্ৰতিঘৰৰ পদূলিত হাত ধুবৰ বাবে চাবোন আৰু পানী ৰখা হৈছে। যাতে ঘৰত প্ৰৱেশৰ সময়ত হাত ধুই প্ৰৱেশ কৰিব পাৰে।
গাঁওখনৰ যুৱচাম আৰু বিশেষকৈ গাঁওৰক্ষী বাহিনীৰ উদ্যোগত মাস্ক পৰিধান সামাজিক দূৰত্ব মানি চলা আৰু কোভিড প্ৰ’টকল সম্পৰ্কে গাঁওবাসীক সজাগ কৰা দেখা গৈছে৷
যাৰ ফলতেই গাঁওখন কোভিডৰ পৰা মুক্ত কৰি ৰাখিব পাৰিছে বুলি গাঁওবাসীয়ে মতপোষণ কৰিছে৷ দেশৰ এই জটিল সময়ত নিজৰ সাৱধানতা আৰু সজাগতাই যে এই মহামাৰীৰ পৰা নিজক বচাই ৰাখিব পৰা যে যায় সেয়া এক প্ৰকাৰ প্ৰমাণ কৰি দেখুৱাইছে টীয়কৰ কাৱৈমাৰী গোঁহাই গাঁৱৰ প্ৰতিটো পৰিয়ালে।
