পোহনীয়া কুকুৰৰ আক্ৰমণত প্ৰাণ গ’ল মালিকৰ। উদ্ধাৰ হ’ল ৰক্তাক্ত মৃতদেহ। হাইদৰাবাদত সংঘটিত হৈছে এই হৃদয় বিদাৰক ঘটনা।
আৰক্ষীৰ সূত্ৰ অনুসৰি মৃত লোকজনৰ নাম পৱন কুমাৰ (৩৮)। যদিও তেওঁ অন্ধ্ৰপ্ৰদেশৰ বাসিন্দা আছিল, তথাপিও তেওঁ কামৰ বাবে মদুৰানগৰৰ ভাড়াঘৰত থাকিছিল। পি সন্দীপ নামৰ এজন ব্যক্তি তেওঁৰ লগত থাকিছিল।
সন্দীপে জনোৱা মতে, দেওবাৰে পৱনে পোহনীয়া কুকুৰৰ সৈতে নিজৰ ঘৰত শুই আছিল। কিছুদিন পূৰ্বে পৱনক উশাহ-নিশাহৰ সমস্যাৰ বাবে চিকিৎসালয়ত ভৰ্তি কৰোৱা হৈছিল। শাৰীৰিক অৱস্থা ভাল হোৱাত তেওঁ ঘৰলৈ উভতি আহিছিল।
দেওবাৰে যেতিয়া পৱন নিজৰ কোঠাত অকলে শুবলৈ গ’ল, তেতিয়া সন্দীপ ড্ৰয়িং ৰুমত টোপনি যায়। সোমবাৰে পুৱা বহু পৱনে দুৱাৰখন নোখোলা দেখি সন্দীপে খৰধৰকৈ স্থানীয় আৰক্ষী থানাত এই বিষয়ে অৱগত কৰে।
আৰক্ষী ঘটনাস্থলীত উপস্থিত হৈ দুৱাৰ ভাঙি ঘৰত প্ৰৱেশ কৰে। শোৱা কোঠাত তেজেৰে লুতুৰি-পুতুৰি হৈ থকাৰ অৱস্থাত উদ্ধাৰ হয় পৱনৰ মৃতদেহ।মথুৰানগৰৰ উপ-পৰিদৰ্শক জি শিৱ শংকৰে কয়, “তথ্য লাভ কৰি আমি সেই স্থানত উপস্থিত হৈছিলো। আমি দুৱাৰ ভাঙি ভিতৰলৈ সোমাই গৈ পৱনৰ তেজ ওলোৱা মৃতদেহটো দেখিছিলো। তেওঁৰ ব্যক্তিগত অংগত কুকুৰে কামোৰাৰ চিন আছিল। এইটোৱেই পৱনৰ মৃত্যুৰ কাৰণ বুলি অনুমান কৰা হৈছে। আৰক্ষীয়ে পৱনৰ মৃতদেহত উদ্ধাৰ কৰাৰ সময়ত মৃতদেহটোৰ কাষতে কুকুৰটো বহি আছিল।”
