মহানগৰীত শনিবাৰে সন্ধিয়া এজন যুৱকে আন এজন যুৱকক ছুৰীৰে আক্ৰমণ কৰি হত্যা কৰা চেষ্টা চলায়। গুৱাহাটীৰ চানমাৰি আৰক্ষী থানাৰ সমীপত সংঘটিত ছুৰীৰে এই আক্ৰমণৰ ঘটনাত গুৰুতৰভাৱে আহত হৈছে যুৱকজন।
আক্ৰমণত গুৰুতৰভাৱে আহত যুৱকজনক নাৰেংগীৰ ওচৰৰ ফৰেষ্ট গেইট অঞ্চলৰ দীপজ্যোতি লহকৰ বুলি চিনাক্ত কৰা হৈছে। তেওঁক লগে লগেই হাস্পাতালত ভৰ্তি কৰা হয়।
আনহাতে, লহকৰক ছুৰীৰে আক্ৰমণ কৰা যুৱকজন মহানগৰীৰ বামুনীমৈদাম অঞ্চলৰ ত্ৰৈলোক্য শৰ্মা বুলি জানিব পৰা গৈছে।
শনিবাৰে সন্ধিয়া চানমাৰি থানাৰ সমীপতে যুৱক দুজনে কাজিয়াত লিপ্ত হোৱাৰ পাছতে এইদৰে এজনে আনজনক ছুৰীৰে আক্ৰমণ কৰি গুৰুতৰভাৱে আহত কৰে।
আৰক্ষীয়ে ইতিমধ্যে এই ঘটনা সংক্ৰান্তত এটা গোচৰ ৰুজু কৰি ঘটনাৰ সৈতে জড়িত আক্ৰমণকাৰী যুৱক ত্ৰৈলোক্য শৰ্মাক গ্ৰেপ্তাৰ কৰিছে।
