শিৱসাগৰ নাজিৰা সংযোগী পথত সংঘটিত এক পথ দুৰ্ঘটনাত এজন যুৱকৰ থিতাতে মৃত্যু হোৱাৰ লগতে আন এজন গুৰুতৰভাৱে আহত হয়।
ঘটনাৰ বিৱৰণী মতে শিৱসাগৰ দিশৰ পৰা বাইকেৰে গৈ থকা দুজন যুৱকৰ লগত নাজিৰাৰ পৰা শিৱসাগৰ দিশে আহি থকা এখন মেজিকৰ সৈতে মু্খামুখি সংঘৰ্ষত গুৰুতৰ ভাৱে আহত হয় বাইক আৰোহী যুৱক দুজন।
লগে লগে স্থানীয় ৰাইজে চেৰেকাপাৰ আৰক্ষীক জনোৱাৰ লগতে ১০৮ সেৱাক অৱগত কৰে যদিও চেৰেকাপাৰ আৰক্ষীৰ আই চি প্ৰদীপ ৰাজখোৱাঁই আঘাত প্ৰাপ্ত যুৱকদুজনক চিকিৎসালয়লৈ নিয়াত অৱহেলা কৰাৰ বাবে বিনা চিকিৎসাৰে এজন যুৱকৰ মৃত্যু হয় বুলি স্থানীয় ৰাইজে অভিযোগ তোলে।
প্ৰায় ডেৰঘন্টা ধৰি যুৱকজন ঘটনাস্থলীতে পৰি আছিল বুলি জানিবলৈ দিয়ে স্থানীয় ৰাইজে।
আৰক্ষীৰ এনে কাৰ্যত ক্ষোভিত হৈ পৰা স্থানীয় ৰাইজ তথা দল সংগঠনে আটাছুৰ শিৱসাগৰ জিলাৰ উপ-সভাপতি তপন চেতিয়াৰ নেতৃত্বত পথ অৱৰোধ কৰে।
চেৰেকাপাৰ আৰক্ষী চকীৰ অই চি জনে সময়মতে যুৱক দুজনক চিকিৎসালয়লৈ প্ৰেৰণ নকৰাৰ বাবেই এজন যুৱকৰ মৃত্যু হোৱা বুলি অভিযোগ কৰি আটাছুৰ লগতে বহু কেইটা দল সংগঠন আৰু স্থানীয় ৰাইজে শিৱসাগৰ নাজিৰা পথটো অৱৰোধ কৰে।
পৰৱৰ্তী সময়ত শিৱসাগৰ আৰক্ষীৰ বহুকেইজন উচ্চপদস্থ বিষয়া আহি ৰাইজৰ লগত আলোচনা কৰাৰ পাছতেহে অৱৰোধ উঠাই দিয়া হয়।
আটাছুৰ উপ-সভাপতি তপন চেতিয়াই কয়, ‘২৪ ঘন্টাৰ ভিতৰত চেৰেকাৰপাৰ আৰক্ষী চকীৰ আই চি প্ৰদীপ ৰাজখোৱাঁক বদলি কৰিব লাগিব।এইজন আৰক্ষী বিষয়াই ডেৰঘন্টা ঘটনাস্থলীত থাকিও এখন গাড়ী যোগাৰ কৰি আহত যুৱকজনক চিকিৎসালয়লৈ প্ৰেৰণ কৰাত অৱহেলা কৰিলে, যাৰ বাবে বিনা চিকিৎসাই যুৱকজনৰ মৃত্যু হ’ল’।
অবৈধ মদৰ দোকানৰ পৰা দৈনিক কমিচন সংগ্ৰহত ব্যস্ত থকা চেৰেকাপাৰ আৰক্ষী চকীৰ এইজন আই চিক ২৪ ঘণ্টাৰ ভিতৰত বদলি কৰিবলৈ দাবী উত্থাপন কৰে আটাছুৱে। অন্যথা তীব্ৰ আন্দোলনৰ কাৰ্যসূচী গ্ৰহণ কৰা হব বুলি জানিবলৈ দিয়ে আটাছুৰ উপ- সভাপতি গৰাকীয়ে।
দুৰ্ঘটনাত মৃত যুৱকজনৰ নাম মনোজ গগৈ। তেওঁৰ ঘৰ মাদুৰী মলাগাঁৱত। পিতৃৰ নাম মাধৱ গগৈ। আনহাতে ভৰিত আঘাতপ্ৰাপ্ত যুৱকজন নাজিৰা ন’মাটিৰ ভাস্কৰ বৰুৱা বুলি জানিব পৰা গৈছে।
