অসমৰ কৃষি ভুমি, বনাঞ্চল, জলাশয়, পৰ্বত পাহাৰ আৰু জনবসতিপূৰ্ণ মাটি বাহিৰৰ বৃহৎ পুঁজিপতি গোষ্ঠীৰ হাতত অৰ্পন কৰিব নোৱাৰিব ৷ অসমৰ কৃষিভুমি, বনাঞ্চল, জনাঞ্চল, জলাশয়, পৰ্বত পাহাৰ সুৰক্ষিত হৈ থাকিব লাগিব ৷ আদানী, আম্বানী, ৰামদেৱ আদিৰ দৰে পুঁজিপতি গোষ্ঠীক এই মাটি হস্তান্তৰ কৰিব নোৱাৰিব ৷ এই দাবী আম আদমি পাৰ্টী, অসমৰ ৷
সোমবাৰে বিয়লি ৰাজভৱনত ৰাজ্যপাল লক্ষ্মণ প্ৰসাদ আচাৰ্যক সাক্ষাৎ কৰি এখন স্মাৰকপত্ৰৰ যোগে এই দাবী উত্থাপন কৰে দলটোয়ে ৷ তদুপৰি অসম গৌৰৱ চাহ অসমৰ বুকুৰ পৰা নাইকিয়া কৰিবৰ বাবে এটা পুঁজিপতি চক্ৰই ষড়যন্ত্ৰ কৰা বুলি অভিযোগ কৰি স্মাৰক পত্ৰখনৰ যোগেদি ৰাজ্যপালক বিষয়টো তদন্ত কৰি বিহিত ব্যৱস্থা গ্ৰহণ কৰিবলৈ অনুৰোধ জনাইছে ৷
এক বিবৃতিত আপৰ ৰাজ্যিক সাধাৰণ সম্পাদক ৰাজীব শইকীয়াই কয় যে, অসম গৌৰৱ চাহ আৰু চাহ বাগিচা সুৰক্ষিত হৈ থাকিব লাগিব ৷ তাৰ বাবে ৰাজ্য চৰকাৰে উদ্যোগ হাতত ল’ব লাগিব আৰু এই ক্ষেত্ৰত চৰকাৰ দায়বদ্ধ হ’ব লাগিব ৷ তেখেতে কয় যে চৰকাৰৰ জ্ঞাত সাৰেই এক বৃহৎ পুঁজিপতি চক্ৰই অসমৰ চাহ বাগানসমুহ ক্ৰয় কৰি নিজৰ হাতলৈ নিব বিচাৰিছে ৷ এই চক্ৰটোৰ এটাই উদ্দেশ্য বাগিচাসমুহ ক্ৰয় কৰি হাজাৰ হাজাৰ বিঘা মাটি নিজৰ হাতলৈ নিব লাগে আৰু সেই মাটিৰ পৰা চাহ গছ উৎখাত কৰি অন্য উদ্যোগ প্ৰতিষ্ঠা কৰিব লাগে ৷ অন্যহাতে ৰাজ্যখনত যোৱা কেইটামান মাহত আইন শৃংখলা পৰিস্থিতি অৱনতি ঘটিছে বুলি অভিযোগ কৰি ৰাজ্যপালক এই ক্ষেত্ৰত হস্তক্ষেপ কৰি আইন শৃংখলা পৰিস্থিতি নিয়ন্ত্ৰণলৈ আনিবলৈ স্মাৰক পত্ৰখনৰ যোগেদি দলটোয়ে অনুৰোধ কৰিছে ৷ লগতে গৃহ মন্ত্ৰীৰ দায়িত্বত থকা মুখ্যমন্ত্ৰী হিমন্ত বিশ্ব শৰ্মাৰ পদত্যাগ দাবী কৰিছে ৷
বিবৃতিটোত দলটোৰ ৰাজ্যিক সভাপতি ডাঃ ভৱেন চৌধুৰীয়ে কয়, অসমৰ কৃষি ভুমি, বনাঞ্চল, জলাঞ্চল, জলাশয়, পৰ্বত পাহাৰৰ মাটি বাহিৰৰ মানুহক গতাই দিয়া কাম অতি ঘৃণনীয় আৰু এই কামৰ বিৰোধীতা কৰি যাব আম আদমি পাৰ্টীয়ে ৷
অন্যহাতে ৰাজ্যিক উপ সভাপতি অনুৰূপা ডেকা ৰজাই কয়, জাতি মাটি ভেটি ৰক্ষাৰ প্ৰতিশ্ৰুতিৰে ক্ষমতালৈ অহা বিজেপি চৰকাৰে এতিয়া জাতি মাটি ভেটি বিক্ৰীৰ কামত লিপ্ত হৈছে ৷ আজি স্মাৰক পত্ৰত উল্লেখ কৰা বিষয়সমুহ ৰাজ্যপাল গৰাকীয়ে গুৰুত্বসহকাৰে গ্ৰহণ কৰিছে বুলি উল্লেখ কৰি দলটোৰ নেতৃত্বই কয় যে, আমি ৰাজ্যপালৰ ওপৰত বিশ্বাস ৰাখিছো, আমাৰ দাবীসমুহ কাৰ্যকৰী কৰিব ৷ আম আদমি পাৰ্টী, অসমৰ ৰাজ্যিক ভাৰপ্ৰাপ্ত সভাপতি ডাঃ ভৱেন চৌধুৰীৰ নেতৃত্বত ৰাজ্যপালক সাক্ষাৎ কৰা দলটোত আছিল ৰাজ্যিক সাধাৰণ সম্পাদক (সংগঠন) ৰাজীব শইকীয়া, উপ সভাপতি অনুৰূপা ডেকাৰজা, ৰাজ্যিক সম্পাদক (প্ৰশাসন) ভিক্টৰ গগৈ আৰু আপ যুৱ শক্তিৰ ৰাজ্যিক সভাপতি জিতু ডেকা।
