কংগ্ৰেছৰ বেংক একাউণ্ট বন্ধ কৰা কাৰ্য বিজেপিৰ বিৰোধীক কণ্ঠৰোধৰ অপচেষ্টা: আপ অসম
দেশৰ সাধাৰণ নিৰ্বাচনৰ দিন চমু চাপি অহাৰ সময়তে আয়কৰ বিভাগে দেশৰ প্ৰধান বিৰোধী দল কংগ্ৰেছৰ চাৰিটাকৈ বেংক একাউণ্ট বন্ধ কৰি দিয়া কাৰ্যক গৰিহণা দিছে আম আদমি পাটি, অসমে।
২০১৮-১৯ চনৰ এক গোচৰৰ অজুহাতত কেন্দ্ৰীয় বিভাগটোৰ এনে কাৰ্যক বিজেপিৰ গণতন্ত্ৰবিৰোধী অভিযানৰ এক অংশ বুলি অভিহিত কৰিছে আপে।
এক বিবৃতি যোগে আপে কয় যে এই কামৰ আঁৰত শাসকীয় দলটোৰ গণতন্ত্ৰবিৰোধী গভীৰ ষড়যন্ত্ৰ নিহিত হৈ আছে।
আপৰ মতে, দেশৰ বিৰোধীক আগন্তুক লোকসভা নিৰ্বাচনত অংশ গ্ৰহণত অসুবিধা সৃষ্টি কৰিবলৈ বিজেপিয়ে প্ৰথমে বিৰোধী নেতাসকলৰ বিৰুদ্ধে ই ডি, চি বি আইৰ দ্বাৰা সঁচাই-মিছাই চমন কৰোঁৱাই ব্যতিব্যস্ত কৰিছে৷
পৰৱৰ্তী সময়ত বিৰোধীয়ে যাতে নিৰ্বাচন খেলাত অসুবিধা হয়, তাৰ বাবে বিৰোধী দলৰ বেংক একাউণ্ট বন্ধ কৰিছে বুলি অভিযোগ কৰে আপ, অসমে।
বিজেপিবিৰোধী বাতাবৰণ সমগ্ৰ দেশতে সৃষ্টি হোৱাত দলটো ক্ষমতাচ্যুত হোৱাৰ শংকাত ভুগিছে আৰু চৰকাৰী সংস্থাসমূহক অপব্যৱহাৰ কৰি বিৰোধীক ৰোধ কৰিবলৈ অপচেষ্টা চলাইছে বুলিও আপে দাবী কৰে।
বিজেপিৰ এনে অগণতান্ত্ৰিক কাৰ্যক আম আদমি পাৰ্টীয়ে কঠোৰ ভাষাৰে গৰিহণা দিয়াৰ লগতে এনে কাৰ্যৰ পৰা বিৰত থাকিবলৈ সকীয়াই দিয়ে।