উপ নিৰ্বাচনক লৈ আপৰ গুৰুতৰ অভিযোগ : চামগুৰিৰ ১০ টা কেন্দ্ৰত ৰিগিঙৰ অভিযোগ মনোজ ধানোৱাৰৰ

“চামগুৰিৰ ১০ টাকৈ ভোটগ্ৰহণ কেন্দ্ৰত ৰিগিং  হৈছে। সমষ্টিটোৰ ৫৩, ৬৭, ৯৯, ১০০ নং বুথ কেন্দ্ৰৰ উপৰি আন ৬ টা কেন্দ্ৰত ৰিগিং হোৱাৰ প্ৰমাণ আছে। উপ নিৰ্বাচন সম্পন্ন হোৱা সমষ্টিটোৰ বুথ কেন্দ্ৰসমূহত চিচিটিভি সংস্থাপন কৰা হোৱা নাছিল। এয়া ৰহস্যজনক। চামগুৰিত শাসকীয় বিজেপিৰ প্ৰাৰ্থী গৰাকীক জিকাবলৈ বিজেপিয়ে যিকোনো ধৰণৰ অনিয়ম সংঘটিত কৰিছে। আমি নিৰ্বাচন আয়োগক ৰিগিং হোৱা কেন্দ্ৰ সমূহত পুনৰ ভোটগ্ৰহণ অনুষ্ঠিত কৰিবলৈ দাবী জনাইছোঁ।” আজি গণেশগুৰিস্থিত আম আদমী পাৰ্টিৰ ৰাজ্যিক কাৰ্যালয়ত অনুষ্ঠিত এক সংবাদমেলত দলৰ ৰাজ্যিক সভাপতি মনোজ ধানোৱাৰে এনেদৰে কয়।

সংবাদমেলত ধানোৱাৰৰ অভিযোগ,” বিহালী সমষ্টিৰ উপ নিৰ্বাচনত সাংসদ গৌৰৱ গগৈয়ে বিধি উলংঘা কৰাৰ কথা কোৱা বিজেপিয়ে চামগুৰিত  সকলো ধৰণৰ অনিয়ম সংঘটিত কৰিছে। ভোটগ্ৰহণৰ দিনা সমষ্টিৰ বাহিৰৰ পৰা গৈ বৰহমপুৰ সমষ্টিৰ বিধায়ক জিতু গোস্বামী আৰু নগাঁও সমষ্টিৰ বিধায়ক ৰূপক শৰ্মাই চামগুৰিত বাহৰ পাতিছিল। ৰহস্যজনক ভাবে বুথ কেন্দ্ৰত চিচিটিভি সংস্থাপন কৰা হোৱা নাছিল। এই বিষয়ে আমি নিৰ্বাচন আয়োগৰ দৃষ্টি আকৰ্ষণ কৰিছোঁ। আমি আশা কৰিছোঁ নিৰ্বাচন আয়োগে নিৰপেক্ষ ভূমিকা পালন কৰিব। ”

আনহাতে, শুকুৰবাৰে গুৱাহাটীৰ ফাঁচী বজাৰত এজন ডেলিভাৰী বয়ৰ ওপৰত আৰক্ষীয়ে চলোৱা নিৰ্যাতনৰ বিৰুদ্ধেও সৰৱ হয় আপৰ ৰাজ্যিক সভাপতি মনোজ ধানোৱাৰ। ঘটনাটো সংঘটিত কৰা পাণবজাৰ থানাৰ ভাৰপ্ৰাপ্ত বিষয়া গৰাকীক শীঘ্ৰেই নিলম্বনৰ পৰিবৰ্তে চাকৰিৰ পৰা বৰ্খাস্ত কৰিবলৈ দাবী জনায় ধানোৱাৰে।

সংবাদমেলত আপৰ নেতাগৰাকীয়ে কয়, ” আৰক্ষীৰ দক্ষতা বৃদ্ধিৰ বাবে প্ৰয়োজনীয় প্ৰশিক্ষণ দিয়াৰ ক্ষেত্ৰত চৰকাৰ বিফল হৈছে। এখন গণতান্ত্ৰিক দেশত আৰক্ষীয়ে নাগৰিকৰ ওপৰত এনে বৰ্বৰ নিৰ্যাতন চলোৱা কোনোপধ্যেই গ্ৰহণযোগ্য নহয়। আম আদমী পাৰ্টিয়ে এই ঘটনাৰ তীব্ৰ গৰিহণা দিছোঁ।” আজি অনুষ্ঠিত সংবাদমেলত আপৰ ৰাজ্যিক উপ সভাপতি সৌমিক সেনগুপ্ত আৰু সাধাৰণ সম্পাদক পুনম গগৈয়েও উপস্থিত থাকে।