অৰবিন্দ কেজৰিৱালক লৈ মধুমেহ বিতৰ্কই পুনৰ চৰ্চা লাভ কৰিছে। দেওবাৰে দিল্লীৰ মুখ্যমন্ত্ৰীৰ আম আদমী পাৰ্টিয়ে দাবী কৰিছিল যে কেজৰিৱালৰ দেহত চেনিৰ মাত্ৰাই (তেজত চেনিৰ মাত্ৰা) ৩০০ অতিক্ৰম কৰিছে। দেওবাৰে দিল্লীৰ তিহাৰ জেলৰ সন্মুখত হাতত ইনচুলিন লৈ প্ৰতিবাদ সাব্যস্ত কৰে কৰে আপৰ নেতা কৰ্মীসকলে।
আম আদমি পাৰ্টিৰ মুৰব্বী কেজৰিৱালে দিল্লীৰ ৰাউজ এভিনিউ আদালতৰ কাষত তেজত চেনিৰ মাত্ৰা নিয়মিতভাৱে পৰীক্ষা কৰিবলৈ অনুমতি বিচাৰিছিল। লগতে তেওঁক চিকিৎসকৰ পৰামৰ্শ লোৱাৰ সুযোগ দিয়াৰ বাবে অনুৰোধ জনায়। বৃহস্পতিবাৰে একেটা গোচৰৰ শুনানিত ইডিৰ বিশেষ অধিবক্তা জোহেব হুছেইনে কয় যে দিল্লীৰ মুখ্যমন্ত্ৰীয়ে ইচ্ছাকৃতভাৱে জেলত অধিক মিঠাই আৰু আম খাই ব্লাড ছুগাৰ বৃদ্ধি কৰিছে। ইডিয়ে লগতে দাবী কৰে যে দিল্লী আবকাৰী দুৰ্নীতিৰ গোচৰত গ্ৰেপ্তাৰ হোৱা কেজৰিৱালে তেজত চেনিৰ মাত্ৰা উঠা-নমা কৰা দেখুৱাই জামিন লাভ কৰিব বিচাৰে।
দেওবাৰে আপ নেতা তথা দিল্লী চৰকাৰৰ মন্ত্ৰী আতিশী মাৰ্লেনাই দাবী কৰে যে কেজৰিৱালৰ চেনিৰ মাত্ৰাই ৩০০ অতিক্ৰম কৰিছে।উল্লেখ্য যে, যদি কোনো ব্যক্তিৰ চেনিৰ মাত্ৰা ৩০০ তকৈ অধিক হয় তেন্তে ইয়াক যথেষ্ট বিপদজনক বুলি গণ্য কৰা হয়। দেওবাৰে আতিশীয়ে কয় যে কেজৰিৱাল যোৱা ২০ দিন জেলত আছে। ৩০ বছৰ ধৰি তেওঁ ডায়েবেটিছ ৰোগী।কেজৰিৱালৰ চেনিৰ মাত্ৰা ৩০০ৰ ওপৰত। আপুনি পৃথিৱীৰ যিকোনো ডাক্তৰক সুধিব, তেওঁ আপোনাক ক’ব যে এই পৰিস্থিতিত ইনচুলিন অবিহনে মধুমেহ নিয়ন্ত্ৰণ কৰিব নোৱাৰি।
আপে কেজৰিৱালক ইনচুলিন ব্যৱহাৰ কৰিবলৈ অনুমতি দিবলৈ অনুৰোধ জনোৱাৰ সময়তে তিহাৰ জেল কৰ্তৃপক্ষই দিল্লীৰ উপ-ৰাজ্যপাল ভি কে ছাক্সেনালৈ চিকিৎসা প্ৰতিবেদন প্ৰেৰণ কৰে। প্ৰতিবেদনত দাবী কৰা হৈছে যে যোৱা ১০ আৰু ১৫ এপ্ৰিলত এজন বিশেষজ্ঞই দিল্লীৰ মুখ্যমন্ত্ৰীৰ স্বাস্থ্য পৰীক্ষা কৰিছিল। একেজন বিশেষজ্ঞই মধুমেহ ৰোগী কেজৰিৱালক ইনচুলিনৰ সলনি ঔষধ দিব লাগে বুলি পৰামৰ্শ দিছিল। আপে অৱশ্যে দাবী কৰিছে যে কেজৰিৱালক চেনিৰ মাত্ৰা হ্ৰাস কৰিবলৈ ঔষধ নহয়, ইনচুলিনৰ প্ৰয়োজন। আৰু দিল্লীৰ মুখ্যমন্ত্ৰীক সেই ইনচুলিন ব্যৱহাৰ কৰাত বাধা দিয়া হৈছে।প্ৰসংগক্ৰমে ২১ মাৰ্চত দিল্লী আবকাৰী দুৰ্নীতিৰ গোচৰত ইডিয়ে কেজৰিৱালক গ্ৰেপ্তাৰ কৰিছিল। ইডিৰ জিম্মাত থকাৰ পাছত দিল্লীৰ মুখ্যমন্ত্ৰীৰ বৰ্তমানৰ ঠিকনা হৈছে তিহাৰ জেইল।
