ৰাজ্যত অবাধে চলি আছে গৰু-গাহৰিৰ ছিণ্ডিকেট, কয়লা চিণ্ডিকেটৰ তদন্তৰ বাবে এছ আই টি গঠনৰ দাবী আপৰ
ৰাজ্যত চলি থকা অবৈধ কয়লা খনন আৰু সৰবৰাহৰ সৈতে অসম চৰকাৰৰ বৰমূৰীয়া সকল জড়িত থকাৰ অভিযোগ আম আদমী পাৰ্টিৰ যুৱ শক্তিৰ নেতা সৌৰভ কলিতাৰ।
আজি গণেশগুৰিস্থিত আপৰ ৰাজ্যিক কাৰ্যালয়ত অনুষ্ঠিত এখন সংবাদমেলত দলৰ যুৱশক্তিৰ সাধাৰণ সম্পাদক সৌৰভ কলিতাই কয়, “আম আদমী পাৰ্টিয়ে ৰাজ্যৰ অবৈধ কয়লা চিণ্ডিকেটৰ বিৰুদ্ধে তদন্ত চলোৱাৰ বাবে বিশেষ তদন্তকাৰী গোট গঠনৰ দাবী জনায়।
কেইদিনমানৰ পূৰ্বে গোৱালপাৰাত কয়লা ভৰ্তি ট্ৰাক জব্দ হোৱাৰ ঘটনাই বিজেপি চৰকাৰ আৰু দলৰ একাংশ নেতাৰ স্বৰূপ উদঙাই দিছে।” আপৰ যুৱনেতাগৰাকীয়ে কয়, “গোৱালপাৰাৰ কয়লা চিণ্ডিকেটৰ সৈতে জড়িত আব্দুৰ ৰহিম জিব্ৰানৰ মন্ত্ৰী পীযুষ হাজৰিকাৰ সৈতে ঘনিষ্ঠ সম্পৰ্ক আছে।”
একেদৰে উজনি অসমত চলি থকা গৰু আৰু গাহৰিৰ চিণ্ডিকেটৰ বিৰুদ্ধেও সৰৱ হয় আপৰ নেতাগৰাকী। অবৈধ গৰু-গাহৰিৰ চিণ্ডিকেটৰ সৈতে চিবচান্দ হাতীবৰুৱা নামৰ এজন লোক জড়িত থকাৰ কথা সংবাদ মাধ্যমত প্ৰকাশ পাইছে। কিন্তু প্ৰশাসনে তেওঁৰ বিৰুদ্ধে কোনো ব্যৱস্থা গ্ৰহণ কৰা নাই। ৰাজ্যখনত চলি থকা চিণ্ডিকেট ৰাজ বন্ধ কৰাৰ ক্ষেত্ৰত মুখ্যমন্ত্ৰী হিমন্ত বিশ্ব শৰ্মা চৰকাৰে কোনো ব্যৱস্থা হাতত নোলোৱাটো ৰহস্যজনক।
আনহাতে, সংবাদমেলত উপস্থিত থকা আপৰ যুৱ শক্তিৰ উপ সভাপতি জিতু ডেকাই ৰাজ্যৰ স্বায়ত্ত শাসিত পৰিষদ অঞ্চল সমূহত স্থাপন কৰা চেকগেটৰ বিৰুদ্ধে সৰৱ হয় । ডিমা হাছাও জিলা, ৰাভা হাছং স্বায়ত্তশাসিত পৰিষদ আৰু অন্যান্য স্বায়ত্ত শাসিত পৰিষদ এলেকাত চেক গেট স্থাপন কৰি প্ৰশাসনে নিয়ন্ত্ৰণহীন ভাবে কৰ সংগ্ৰহ কৰাৰ অভিযোগ উত্থাপন কৰে জিতু ডেকাই।
তেওঁ কয়, “বৰ্তমান চৰকাৰে জনসাধাৰণৰ ওপৰত অত্যধিক কৰৰ বোজা জাপি দিছে। এনে জনবিৰোধী নীতিয়ে অসমবাসীক প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ নেতৃত্বাধীন পূৰ্বৰ অসম গণ পৰিষদ চৰকাৰৰ স্বৈৰাচাৰী নীতি মনত পেলাই দিছে। জনসাধাৰণক কৰ-কাটল বোজাৰে জ্বলা – কলা খুওৱা চৰকাৰক আগন্তুক দিনত ৰাইজে উচিত প্ৰত্যুত্তৰ দিব। “