আম আদমী পাৰ্টিৰ পৰা পদত্যাগ কৰি ভাৰতীয় জনতা পাৰ্টিত যোগদান কৰা ৭ গৰাকী ৰাজ্যসভাৰ সাংসদক অযোগ্য ঘোষণা কৰাৰ দাবীত দেওবাৰে আপে আনুষ্ঠানিকভাৱে ৰাজ্যসভাৰ অধ্যক্ষ চি পি ৰাধাকৃষ্ণণলৈ এখন আৱেদন প্ৰেৰণ কৰিছে। শুকুৰবাৰে দলটোৰ জ্যেষ্ঠ নেতা তথা সাংসদ ৰাঘৱ চাড্ডাৰ নেতৃত্বত ৭ গৰাকী সাংসদে আপ ত্যাগ কৰি বিজেপিত যোগদান কৰাৰ পাছতেই এই কঠোৰ আইনী পদক্ষেপ গ্ৰহণ কৰা হৈছে।
আপৰ জ্যেষ্ঠ নেতা সঞ্জয় সিঙে এক সংবাদমেল সম্বোধন কৰি কয় যে এই ৭ গৰাকী সদস্যৰ দলত্যাগ কাৰ্য দলত্যাগ বিৰোধী আইনৰ স্পষ্ট উলংঘন। শুকুৰবাৰে ৰাঘৱ চাড্ডা, অশোক মিট্টাল, সন্দীপ পাঠক, হৰভজন সিং, ৰাজেন্দ্ৰ গুপ্তা, বিক্ৰম সাহনী আৰু স্বাতী মালিৱালে অৰবিন্দ কেজৰিৱাল নেতৃত্বাধীন দলটোৱে নিজৰ মূল নীতি আৰু আদৰ্শৰ পৰা বিচ্যুত হোৱা বুলি অভিযোগ উত্থাপন কৰি পদত্যাগ কৰিছিল।দলত্যাগী সাংসদ ৰাঘৱ চাড্ডা এই যোগদানক ন্যায়সংগত বুলি দাবী কৰি উল্লেখ কৰিছে যে সাংবিধানিক নিয়ম অনুসৰি কোনো এটা দলৰ দুই-তৃতীয়াংশ সদস্যই আন এটা দলত চামিল হ’লে তেওঁলোক অযোগ্য বিবেচিত নহয়।
উল্লেখ্য যে ৰাজ্যসভাত আপৰ মুঠ ১০ খন আসন থকাৰ বিপৰীতে ৭ গৰাকী সাংসদে দল ত্যাগ কৰাৰ ফলত এই সংখ্যা দুই-তৃতীয়াংশৰ সীমা অতিক্ৰম কৰিছে বুলি তেওঁ দাবী কৰে।অৱশ্যে সঞ্জয় সিঙে এই দাবী খণ্ডন কৰি প্ৰকাশ কৰিছে যে দলটোৱে জ্যেষ্ঠ অধিবক্তা কপিল চিব্বল আৰু লোকসভাৰ এগৰাকী প্ৰাক্তন মহাসচিবকে ধৰি সংবিধান বিশেষজ্ঞৰ সৈতে আলোচনা কৰিছে আৰু বিশেষজ্ঞসকলৰ মতে এই সাংসদসকল আইন অনুসৰি অযোগ্য ঘোষণাৰ যোগ্য। সিঙে লগতে অভিযোগ কৰে যে এই কাৰ্যই বিশেষকৈ পঞ্জাৱৰ জনসাধাৰণৰ প্ৰতি চৰম বিশ্বাসঘাতকতা কৰিছে, যিহেতু এই ৭ গৰাকীৰ ভিতৰত ৬ গৰাকীয়েই উচ্চ সদনত পঞ্জাৱক প্ৰতিনিধিত্ব কৰে। গণতান্ত্ৰিক মূল্যবোধ ৰক্ষাৰ স্বাৰ্থত এতিয়া দলটোৱে তেওঁলোকৰ সদস্যপদ বাতিল কৰিবলৈ ৰাজ্যসভাৰ অধ্যক্ষক আহ্বান জনাইছে।
