বুধবাৰে গুৱাহাটী পৌৰ নিগমৰ নিৰ্বাচনৰ শেষ নিৰ্বাচনী প্ৰচাৰত ব্যস্ত হৈ পৰে আম আদমী পাৰ্টী।
আজি গুৱাহাটীৰ ভৰলুমুখস্থিত সোণাৰাম হাইস্কুল খেলপথাৰৰ পৰা উলুবাৰীলৈকে আপে বাহিৰ কৰে এক বৃহৎ সমদল। য’ত উপস্থিত থাকে দিল্লী বিধানসভাৰ বিধায়িকা অতিশী মাৰ্লিনা।
দুপৰীয়া প্ৰায় ১২ বজাত বাহিৰ কৰা এই সমদলত প্ৰথমে মহানগৰ আৰক্ষী-প্ৰশাসনে অনুমতি প্ৰদান কৰা নাছিল যদিও পাছলৈ এই সমদল বাহিৰ কৰিবলৈ অনুমতি প্ৰদান কৰে।
বিধায়িকা অতিশী মাৰ্লিনাৰ সৈতে উপস্থিত থাকে আম আদমী পাৰ্টীৰ অসম ৰাজ্যিক সমিতিৰ সভাপতি ড০ ভৱেন চৌধুৰী, উপ সভাপতি লক্ষ্মীকান্ত ডুবেৰ লগতে অন্যান্য বিষয়ববীয়াসকল ।
সমদলত অংশগ্ৰহণ কৰি মুখ্যমন্ত্ৰী ড০ হিমন্ত বিশ্ব শৰ্মাক ক্ষুৰধাৰ সমালোচনা কৰে আপৰ বিধায়িকা অতিশী মাৰ্লিনাই।
তেওঁ কয় ‘ বিজেপিৰ পূৰ্বে কংগ্ৰেছৰ চৰকাৰ আছিল। কিন্তু দুয়োখন চৰকাৰে সাধাৰণ জনতাৰ বাবে একো কাম নকৰিলে। আজি অসমৰ ছাত্ৰ-ছাত্ৰীৰ পঢ়া-শুনাৰ বাবে এখন উন্নত বিদ্যালয় নাই, উন্নত চিকিৎসাৰ বাবে ভাল চিকিৎসালয় নাই। গুৱাহাটী অসমৰ ৰাজধানী চহৰ হোৱা সত্বেও খাবলৈ এটুপি বিশুদ্ধ পানীৰ অভাৱত ভুগি আছে সাধাৰণ জনতা। এখন ৰাজধানী চহৰত কেনেকৈ পানীৰ সমস্যা থাকিব পাৰে? মহিলাৰ সুৰক্ষা নাই, চি.চি. টিভি নাই। যদি ৰাজধানী চহৰৰে এই অৱস্থা হয় তেন্তে অসমৰ অন্য প্ৰান্তৰ কি অৱস্থা হ’ব? ৬ বছৰ ধৰি গুৱাহাটীখন মুখ্যমন্ত্ৰী ড০ হিমন্ত বিশ্ব শৰ্মাই পৰিচালনা কৰি আছিল। ইমানৰ পিছতো উন্নয়ন নাই কিয়’