উচ্ছেদৰ পিছত অসম – নগালেণ্ড সীমান্তৰ বিশেষকৈ গোলাঘাট জিলাৰ সৰুপথাৰৰ ‘এ’ , ‘বি’ আৰু ‘চি’ চেক্টৰত নগালেণ্ডৰ ফালৰ পৰা অসমৰ লোকৰ ওপৰত হোৱা ঘটনা প্ৰৱাহত গভীৰ উদ্বেগ প্ৰকাশ কৰিছে আম আদমি পাৰ্টী, অসম (আপ) য়ে ৷ আজি এক প্ৰেছ বিবৃতিত আপৰ ৰাজ্যিক নেতা ৰাজীব শইকীয়াই মুখ্যমন্ত্ৰী হিমন্ত বিশ্ব শৰ্মা নেতৃত্বাধীন ৰাজ্য চৰকাৰৰ বিৰুদ্ধে অভিযোগ কৰি কয় যে, বিজেপি চৰকাৰে সীমান্তৰ এ বি আৰু চি চেক্টৰৰ সমস্যা জোৰা টাপলি মাৰি ঢাকি ৰাখিব বিচাৰিছে৷
যোৱা তিনি অক্টোবৰত চি চেক্টৰৰ টেঙাতল গাঁৱত নগাই অস্ত্ৰ শস্ত্ৰৰে আক্ৰমণ চলাই শতাধিক ঘৰ জ্বলাই ভষ্মীভুত কৰিলে৷ উচ্ছেদৰ পিছৰে পৰা নগাৰ দ্বাৰা হিংসাত্মক ঘটনা বৃদ্ধি পালে৷ তাৰ পিছতো কিন্তু ৰাজ্য চৰকাৰে এই ঘটনাবোৰক সাধাৰণ আইন শৃংখলাজনিত ঘটনা হিচাপে মানি লোৱাহে পৰিলক্ষিত হৈছে ৷ অসম-নগালেণ্ডৰ সীমা সমস্যা স্থায়ী সমাধানত ৰাজ্য আৰু কেন্দ্ৰৰ বিজেপি চৰকাৰ চূড়ান্তভাৱে ব্যৰ্থ হৈছে বুলি অভিযোগ কৰি আপৰ নেতাজনে কয় যে, চৰকাৰে ব্যৰ্থতা স্বীকাৰ কৰক৷ সীমান্তৰ সৰুপথাৰ সমষ্টি আৰু কাজিৰঙা লোকসভা সমষ্টিক বিজেপিৰ বিধায়ক আৰু সাংসদে প্ৰতিনিধিত্ব কৰিছে, লগতে সীমান্ত উন্নয়ণ বিভাগৰ মন্ত্ৰীজনেও গোলাঘাট জিলাৰ পৰাই মন্ত্ৰীসভাত প্ৰতিনিধিত্ব কৰা কথা উল্লেখ কৰি আপৰ ৰাজ্যিক নেতাজনে অভিযোগ কৰি কয়, সীমান্ত উন্নয়ণ বিভাগৰ মন্ত্ৰীজনে আজিলৈকে সীমান্ত ভ্ৰমণ নকৰিলে৷
সীমা সমস্যাৰ স্থায়ী সমাধানত বিজেপি চৰকাৰ কনমানো আগ্ৰহী নহয় বুলি অভিযোগ কৰি আপৰ নেতাজনে কয়, আগ্ৰহ থকা হ’লে সঘনাই সৰুপথাৰলৈ অহা মুখ্যমন্ত্ৰীয়ে সাম্প্ৰতিক সীমান্তৰ ঘটনা প্ৰবাহৰ পৰিপ্ৰেক্ষিত্বত সীমান্ত ভ্ৰমণ কৰি সীমা সমস্যা সমাধানৰ পদক্ষেপ ল’লেহেঁতেন! সুন্দৰম আয়োগৰ পৰামৰ্শৰ ভিত্তিত দুয়োখন ৰাজ্যৰ সীমা সমস্যা সমাধানৰ পোষকতা কৰি আপৰ নেতাজনে এই ক্ষেত্ৰত কেন্দ্ৰ আৰু ৰাজ্য চৰকাৰক পদক্ষেপ ল’বলৈ আহ্বান জনায় ৷
