অসমক দেশৰ পাঁচখন উন্নত ৰাজ্যৰ ভিতৰত নাম লিখোৱাৰ কথা কোৱা আৰু চৰকাৰৰ ধনৰ অভাৱ নাই বুলি সততে জাহিৰ কৰা মুখ্যমন্ত্ৰী হিমন্ত বিশ্ব শৰ্মাই আজিলৈকে কোনো নতুন উদ্যোগ গঢ়িব পৰা নাই, বৰং উদ্যোগ তথা বিক্ৰীৰ ক্ষেত্ৰত সৰ্বশ্ৰেষ্ঠ মুখ্যমন্ত্ৰী হ’বলৈহে প্ৰতিযোগিতাত নামি পৰিছে বুলি আম আদমি পাৰ্টীয়ে উল্লেখ কৰে।
শেহতীয়াকৈ অসম চাহ নিগমৰ ১২ খন চাহ বাগিচা ক্রমে চৈকতা, নাগিনীজান, ৰজাবাৰী, চৰাইদেউ, দীপলিং, নেঘেৰিটিং, ৰঙামাটি, দিজুভেলী, লুংচুং, আমলখি, ইচাবিল, লংগাই চাহ বাগিচা অসম চৰকাৰে লীজত দিবলৈ লোৱা সিদ্ধান্তৰ তীব্ৰ প্ৰতিক্ৰিয়া প্ৰকাশ কৰিছে আপে।
অসমৰ ৰাজ্যিক সমন্বয়ক ড° ভবেন চৌধুৰীয়ে কয় “পৰিতাপৰ কথা যে এই বাৰখন চাহ বাগিচাৰ ভিতৰত নেঘেৰিটিং, নাগিনীজান, দিজুভেলী চাহ বাগিচাত উৎকৃষ্ট চাহ উৎপাদন হয় বুলি দীৰ্ঘদিনীয়া সুনাম আছে। দেশ তথা বিদেশতো এই তিনিখন চাহ বাগিচাত উৎপাদিত চাহৰ চাহিদা আছে।”
একমাত্র উচিত ব্যৱস্থাপনাৰ অভাৱতেই ১৫ খনকৈ চাহ বাগিচা থকাৰ পিছতো বছৰি ঘাটিৰ সন্মুখীন হোৱা চাহ নিগমে নিজৰ একাংশ অলগদ্ধ আৰু ঘোচখোৰ বিষয়াৰ বাবে এতিয়া ১২ খন চাহ বাগিচা ব্যক্তিগত খণ্ডৰ হাতলৈ অৰ্পন কৰিব ওলাইছে বুলি উল্লেখ কৰে
আপৰ ৰাজ্যিক সমন্বয়ক ড° ভবেন চৌধুৰীয়ে।
“লক্ষণীয় যে এশ বছৰ ধৰি বিশ্ববাসীক চাহ খুওৱা অসমৰে চাহ নিগমটোৱে পোন্ধৰখনকৈ চাহ বাগিচা সঠিক ব্যৱস্থাপনা কৰিব নোৱাৰাৰ লগতে ঘাটিৰ বাবে গুৱাহাটীত থকা মুখ্য কাৰ্যালয়ো বিক্ৰী কৰিছিল। উল্লেখ্য যে চাহ নিগমে এতিয়াও চাহ শ্ৰমিকৰ ভবিষ্যনিধিৰ ১৪২.৪৫ কৌটি টকা জমা দিবলৈ বাকী আছে।
এনে অৱস্থাত ব্যক্তিগত খণ্ডক চাহ বাগিচাবোৰ অৰ্পণ কৰি বিজেপি চৰকাৰে ৰাজ্যত ৰাজহুৱা সম্পত্তিৰ ব্যক্তিগতকৰণৰ সূচনা কৰিব বিচৰিছে।” তেওঁ লগতে কয়।
বিজেপি চৰকাৰে হাজাৰ হাজাৰ শ্রমিকৰ ভৱিষ্যৎ অন্ধকাৰত ঠেলি দিব বিচৰা এই কাৰ্যত প্ৰতিক্ৰিয়া প্ৰকাশ কৰি আম আদমি পার্টীয়ে ১২ খন বাগিচা চলাব নোৱৰা হিমন্ত বিশ্ব শৰ্মাই ৰাজ্য এখন চলাব সামর্থ্য নাই বুলিও অভিযোগ উত্থাপন কৰে। লগতে দলটোৱে অসম চৰকাৰক এই লীজত দিব বিচৰা সিদ্ধান্ত প্ৰত্যাহাৰ কৰি চাহ শ্রমিক সকলৰ জীবন জীৱিকাৰ সুৰক্ষা নিশ্চিত কৰিবলৈ দাবী জনায়।
