শনিবাৰে এক সংবাদমেল সম্বোধন কৰি আম আদমি পাৰ্টীৰ ৰাজ্যিক সমন্বয়ক ভৱেন চৌধুৰীয়ে বিজেপিয়ে হিতাধিকাৰীক ভাবুকিৰে নির্বাচনী বৈতৰণী পাৰ হোৱাৰ অপচেষ্টা চলাইছে বুলি মন্তব্য প্ৰকাশ কৰে।
তেওঁ কয় “চৰকাৰ এখন সকলোৰে বাবে, তাত দল- মতৰ কথা আহি নপৰে। একেদৰে চৰকাৰী আঁচনি একমাত্র দলীয় কৰ্মীৰ বাবে নহয়। চৰকাৰী আঁচনিৰ হিতাধিকাৰী এজনে আন দলৰ প্রার্থীক ভোট দিব পাৰে বা আন দলৰ হৈ নিৰ্বাচনত প্ৰচাৰ কৰিব পাৰে।”
৫২ নং ৱাৰ্ডৰ এগৰাকী মহিলাই বিৰোধী পাৰ্টীৰ হৈ প্ৰচাৰ চলোৱা আৰু তেওঁ হিতাধিকাৰী হোৱাৰ বাবেই বিজেপি কর্মীয়ে অৰুণোদয় আঁচনিৰ পৰা তেওঁৰ নাম কৰ্তন কৰা হ’ব বুলি টেলিফোন যোগে ভাবুকি প্রদান কৰা কাৰ্যক অসাংবিধানিক আৰু গণতন্ত্ৰ বিৰোধী বুলি চৌধুৰীয়ে মন্তব্য কৰে।
খোৱাপানীৰ সমস্যা, কৃত্রিম বান, ৰাস্তা-ঘাটৰ দুৰাৱস্থা, ষ্ট্রীট লাইটকে ধৰি গুৱাহাটীৰ এশ-এবুৰি সমস্যা সঠিকভাৱে সমাধান নকৰি একমাত্র চৰকাৰী আঁচনিত কেলেংকাৰী কৰি নিজৰ পকেট গৰম কৰা বিজেপিয়ে নির্বাচনী বৈতৰণী পাৰ হ’বলৈ এতিয়া ভয়-ভাবুকিৰ আশ্ৰয় লৈছে বুলিও তেওঁ কয়।
এনে ভীতি প্রদর্শনে পৌৰ নিগমৰ নিৰ্বাচনত ডুবন্ত বিজেপিক কোনো প্ৰকাৰে সহায় নকৰে বুলি স্পষ্ট কৰি দিয়ে আপ, অসমে। ৰাইজৰ উন্নতিৰ দিশলৈ পিঠি দি একমাত্র হিতাধিকাৰী সৃষ্টি কৰি গাদী ৰক্ষা কৰি থাকিব পাৰিব বুলি ভাবি থকা বিজেপিক যিমান সোনকালে ক্ষমতাচ্যুত কৰিব, সিমানেই মংগল বুলি তেওঁ পুনৰ উল্লেখ কৰে।
ইফালে আম আদমি পাৰ্টীয়ে কামৰূপ মহানগৰৰ উপায়ুক্তক আহ্বান জনায় যাতে তেওঁৰ কাৰ্যালয়ৰ নাম লৈ হিতাধিকাৰী মহিলাক ভাবুকি প্রদান কৰা বিজেপি কর্মীজনৰ বিৰুদ্ধে অতি সোনকালে বিহিত ব্যৱস্থা গ্রহণ কৰে।
