অৱশেষত দিল্লী পৌৰ নিগম নিজৰ অধীনলৈ আনিবলৈ সক্ষম হ’ল অৰবিন্দ কেজৰিৱালৰ আম আদমী পাৰ্টিয়ে। তিনিটাকৈ কাৰ্যকাল পৌৰ নিগম দখলত ৰখা বিজেপিক পৰাভূত কৰি প্ৰথমবাৰৰ বাবে বিজয় ধ্বজা উৰুৱালে কেজৰিৱাল বাহিনীয়ে।
আজি ঘোষিত ফলাফলত নিগমৰ ২৫০ ৱাৰ্ডৰ ভিতৰত ১৩৪ টা ৱাৰ্ড দখলেৰে নিগম দখল কৰিছে আপে। আনহাতে ১০৪ টা ৱাৰ্ডেৰে এইবাৰ দ্বিতীয় স্থানতে সন্তুষ্ট থাকিবলগীয়া হৈছে বিজেপি।
ইফালে দেশৰ ৰাজনীতিত ক্ৰমে খহনীয়াৰ সন্মুখত হোৱা কংগ্ৰেছ কেন্দ্ৰীয় শাসিত প্ৰদেশখনৰ পৌৰ নিৰ্বাচনতো মাত্ৰ ৯ টা ৱাৰ্ডতে সীমাবদ্ধ থাকিল।
উল্লেখ্য যে ২০১৭ চনৰ পৌৰ নিগম নিৰ্বাচনত বিজেপিয়ে মুঠ ২৭২ টা ৱাৰ্ডৰ ভিতৰত ১৮১ টা ৱাৰ্ড লাভ কৰিছিল। আনহাতে আপে ৪৮ টা আৰু কংগ্ৰেছে ৩০ টা ৱাৰ্ড দখল কৰিছিল।
এই বিজয়ৰ পাছতে দিল্লীৰ আপ কাৰ্যালয়ত বিৰাজ কৰে উছৱমুখৰ পৰিৱেশে। আপ সমৰ্থকসকলে দলীয় পতাকাৰ লগতে দিল্লীৰ মুখ্যমন্ত্ৰী অৰবিন্দ কেজৰিৱালৰ মুখাবয়বৰ ছবি পৰিধান কৰি ৰাজপথত সমদল উলিয়াই বিজয়ৰ আনন্দ উদযাপন কৰে।
লক্ষণীয়ভাৱে বিগত ২৪ বছৰত বিজেপিয়ে দিল্লীত ৰাজ্য চৰকাৰ গঠন কৰা নাই যদিও পৌৰ নিগমত নিজৰ কৰ্তৃত্ব অব্যাহত ৰাখিছিল।
আনকি ২০১৫ চনৰ বিধানসভা নিৰ্বাচনত আপে ৭০ খন আসনৰ ভিতৰত অভিলেখ সংখ্যক ৬৭খন আসন লাভ কৰাৰ পাছতো বিজেপিয়ে বিধানসভা নিৰ্বাচনৰ দুবছৰৰ পাছত নিগমৰ নিৰ্বাচনত জয় সাব্যস্ত ৰাখিছিল।
