সুদূৰ পশ্চিমৰ মহাৰাষ্ট্ৰৰ চৰকাৰী পাঠ্যপুথিত অসমৰ যাদৱ পায়েঙক “অঘৰী” জনজাতিৰ মানুহ হিচাপে উপস্থাপন কৰা বাবে অসমৰ পৰা হোৱা প্ৰতিবাদ নহয়। অসমৰে চৰকাৰী পাঠ্যপুথিত ৰাজ্যখনৰে এটা অন্যতম সম্প্ৰদায়ক ভুলকৈ উপস্থাপন কৰা বাবে প্ৰতিবাদ কৰিব লগীয়া হৈছে সম্প্ৰদায়টোৰ লোকসকলে।
ব্ৰিটিছ আমোলতেই চাহ শ্ৰমিক হিচাপে অসমৰ সমাজ জীৱনত প্ৰৱেশ ঘটা উৰিষ্যা, ঝাৰখণ্ড, চট্টিচগড় আদিৰ আদিবাসী লোকেৰে গঠিত এই লোকসকলক চৰকাৰী পাঠ্যপুথিত “চাহ জনগোষ্ঠী” বুলি উল্লেখ কৰা হৈছে।
শেহতীয়াকৈ অসমীয়া বিষয়ৰ নৱম শ্ৰেণীৰ দ্ৰুত পাঠ হিচাপে চৰকাৰে অন্তৰ্ভুক্ত কৰা “বৈচিত্ৰ্যময় অসম” নামৰ পুথিখন প্ৰকাশ কৰিছে অসম ৰাজ্যিক পাঠ্যপুথি প্ৰণয়ন আৰু প্ৰকাশন পৰিষদে। বিতৰ্কত অহা প্ৰবন্ধটোৰ লেখক সুশীল কুৰ্মী, যি নিজেও এজন উক্ত সম্প্ৰদায়টোৰে লোক।
এনেকৈ এটা স্পষ্ট আৰু স্বকীয় পৰিচয় থকা আদিবাসী লোকসকলক “চাহ জনগোষ্ঠী” বুলি উল্লেখ কৰাত ক্ষোভ আৰু প্ৰতিবাদ কৰিছে সম্প্ৰদায়টোৰ অন্যতম সংগঠন সদৌ আদিবাসী ছাত্ৰ সন্থা (All Adivasi Students’ Association), চমুকৈ আছাই।
লগতে পঢ়ক যাদৱ পায়েঙক অঘৰী জনজাতিৰ মানুহ হিচাপে উপস্থাপন মহাৰাষ্ট্ৰৰ চৰকাৰী বিদ্যালয়ৰ পাঠ্যপুথিত
জাঙুৰ খাই উঠা সদৌ অসম আদিবাসী ছাত্ৰ সন্থাই আজি শতাধিক চাহ শ্ৰমিক, মহিলা, নেতা-কৰ্মীক লৈ নগাঁৱৰ চামগুৰিৰ উদমাৰিত এটা প্ৰতিবাদী কাৰ্য্যসূচী ৰূপায়ণ কৰে। প্ৰতিবাদকাৰীসকলে ৰাজপথত অসম সাহিত্য সভাৰ বিষয়ববীয়া তথা সাহিত্যিক সুশীল কুৰ্মীৰ প্ৰতিকৃতি দাহ কৰে।
অসম ৰাজ্যিক পাঠ্যপুথি প্ৰণয়ন আৰু প্ৰকাশন পৰিষদৰ উপাধক্ষ্য জিতু গোস্বামীক শীঘ্ৰে ইয়াক শুদ্ধ ৰূপত উপস্থাপন কৰিবৰ বাবে দাবী কৰিছে সংগঠনটোৰ নগাঁও জিলা সমিতিৰ লগতে উদমাৰী আঞ্চলিক সমিতিয়ে।
এই ভুল শুধৰণি নকৰালৈকে নগাঁও জিলাৰ চাহ বাগিচা অঞ্চলৰ চৰকাৰী বিদ্যালয়সমূহত “বৈচিত্ৰ্যময় অসম” নামৰ পাঠ্যপুথিখন নিষিদ্ধ কৰাৰ সিদ্ধান্ত গ্ৰহণ কৰে সংগঠনটোৱে।
উল্লেখ কৰিব পাৰি যে যোৱা বছৰ মহাৰাষ্ট্ৰৰ চৰকাৰৰ দশম শ্ৰেণীৰ বিজ্ঞান আৰু প্ৰযুক্তিৰ পাঠ্যপুথিত অসমৰ “অৰণ্য মানৱ” খ্যাত যাদৱ পায়েঙৰ কাহিনীটো অন্তৰ্ভুক্ত কৰিবলৈ গৈ তেওঁক ‘অঘৰী জাতিৰ মানুহ’ (nomadic tribe) বুলি উল্লেখ কৰাত অসমত ব্যাপক প্ৰতিক্ৰিয়াৰ সৃষ্টি হৈছিল।
