‘কেব’ৰ বিৰোধিতা অব্যাহত থাকিলে বৰাক পৃথক হৈ যোৱাৰ হুংকাৰ

হিন্দু বাংলাদেশীক নাগৰিকত্ব দিবলৈ ওলোৱা নাগৰিকত্ব সংশোধনী বিধেয়কখন সমৰ্থন কৰিবলৈ গৈ পুনৰ বিতৰ্কিত মন্তব্য কৰিছে বৰাকৰ বহিষ্কৃত বিজেপি নেতা তথা প্ৰাক্তন ছাত্ৰ নেতা প্ৰদীপ দত্ত ৰয়ে।

সদৌ কাছাৰ কৰিমগঞ্জ হাইলাকান্দি ষ্টুডেণ্টছ এছ’চিয়েশ্যনৰ প্ৰতিষ্ঠাপক সভাপতিজনে আজি এখন সংবাদমেল দি কয় যে আছু আৰু কৃষক মুক্তিৰ ‘কেব’ৰ বিৰোধিতাই অসমখনক ৫টা ভাগত টুকুৰা টুকুৰ কৰিব।

‘‘আছু আৰু অখিল গগৈৰ কৃষক মুক্তিয়ে যি ধৰণে ‘কেব’খন গৃহীত কৰাৰ তীব্ৰ বিৰোধিতা কৰিছে, ই অসমখনক পাঁচ টুকুৰা কৰিব’’, নিজৰ ঘৰতে দিয়া সংবাদমেলত বিতৰ্কিত নেতাজনে কয়।

প্ৰদীপ দত্ত ৰয়ে পূৰ্বেও ‘কেব’ৰ ঘোৰ সমৰ্থন কৰি আহিছে আৰু কেইবাটাও অসমীয়া বিৰোধী বিতৰ্কিত মন্তব্য কৰাৰ উদাহৰণ আছে। অসম বিশ্ববিদ্যালয়ৰ ছাত্ৰ-ছাত্ৰীয়ে ‘কেব’ৰ বিৰোধিতা কৰিলে বিশ্ববিদ্যালয়ত সোমাবলৈ দিয়া নহ’ব বুলি মন্তব্য কৰি এবাৰ বিতৰ্কত সোমোৱাৰ উপৰি অসম সাহিত্য সভাৰ সভাপতিকো উভতি ধৰিছিল।

বিতৰ্কিত মন্তব্য কৰাৰ পিছতে তেওঁক যোৱা জানুৱাৰি মাহত বিজেপিৰ পৰা বহিষ্কাৰ কৰিছিল দলটোৱে।

আজি সংবাদমেলত নেতাজনে এইদৰে ‘কেব’ৰ বিৰোধিতা অব্যাহত থাকিলে বৰাক পৃথক হৈ যাব বুলি সকীয়াই দিয়ে।

‘‘যদিহে এই সংগঠনবোৰৰ দ্বাৰা কেবৰ বিৰোধিতা অব্যাহত থাকে, তেন্তে বৰাক পৃথক হৈ যাব আৰু লগতে বড়োলেণ্ড, কাৰ্বি আংলং আৰু ডিফু, কমতাপুৰ বেলেগ হৈ যাব’’, কোন কোন অংশত অসম ভাগ হ’ব বুলি সোধা সাংবাদিকৰ প্ৰশ্নৰ উত্তৰত দত্তই কয়।

তেওঁলোকে অসমখনক ভাগ ভাগ কৰিবলৈ চেষ্টা কৰি আছে আৰু তেওঁলোকৰ প্ৰতিবাদ সোনকালে বন্ধ কৰিব লাগে বুলি দাবী কৰি নেতাজনে কয়, “যিয়েই নহওক, ‘কেব’খন ডিচেম্বৰৰ প্ৰথম সপ্তাহতে সংসদত উত্থাপন কৰা হ’বই। কোনেও ইয়াক গৃহীত হোৱাৰ পৰা ৰখাব নোৱাৰে।”

গোটেই দেশতে এন আৰ চি উন্নত কৰিবলৈ কেন্দ্ৰই লোৱা সিদ্ধান্ত সন্দৰ্ভত তেওঁ কয়, “অসমক বাদ দি নাগৰিকত্বৰ ১৯৫১ ভিত্তিবৰ্ষ লৈ কৰি থাকক।”

“মই অসমত ১৯৭১ ভিত্তিবৰ্ষ আন্তৰিকতাৰে সমৰ্থন কৰো। এইটো কিয় সলনি কৰিব লাগে? অসমতো যদি ১৯৫১ ভিত্তিবৰ্ষ হয়, অসম চুক্তিৰ কি হ’ব?”, প্ৰশ্ন প্ৰদীপ দত্ত ৰয়ৰ।