বিহাৰত ৩ হাজাৰতকৈও অধিক শিক্ষকক চাকৰিৰ পৰা বৰখাস্ত কৰাৰ প্ৰক্ৰিয়া আৰম্ভ হৈছে। তেওঁলোকৰ বিৰুদ্ধে ভুৱা ডিগ্ৰী আৰু জাল প্ৰমাণপত্ৰ ব্যৱহাৰ কৰি চৰকাৰী চাকৰি লাভ কৰাৰ গুৰুতৰ অভিযোগ উত্থাপন হৈছে। ২০০৬ চনৰ পৰা ২০১৫ চনৰ ভিতৰত হোৱা শিক্ষক নিযুক্তি প্ৰক্ৰিয়াৰ সন্দৰ্ভত ৰাজ্যখনৰ ভিজিলেন্স ব্যুৰোৰ এক সবিশেষ তদন্তৰ অন্তত এই বৃহৎ পদক্ষেপ গ্ৰহণ কৰা হৈছে। এই সন্দৰ্ভত বিহাৰৰ শিক্ষামন্ত্ৰী মিথিলেশ তিৱাৰীয়ে আনুষ্ঠানিকভাৱে ঘোষণা কৰিছে। পশ্চিমবঙ্গৰ শিক্ষক নিযুক্তি কেলেংকাৰীৰ পিছত এইবাৰ বিহাৰতো শিক্ষা খণ্ডৰ অনুৰূপ ধৰণৰ ব্যাপক অনিয়মৰ ক‘লা ছবি পোহৰলৈ আহিছে।
এক সৰ্বভাৰতীয় সংবাদ মাধ্যমৰ সূত্ৰ অনুসৰি, সৰ্বমুঠ ৩ হাজাৰ ৩৫ গৰাকী শিক্ষকৰ বিৰুদ্ধে এই ভুৱা প্ৰমাণপত্ৰৰ অভিযোগ অনা হৈছে। ইয়াৰে ভিতৰত ইতিমধ্যে ১৮৩০ গৰাকী শিক্ষকৰ বিৰুদ্ধে এজাহাৰ দাখিল কৰা হৈছে। উল্লেখ্য যে শিক্ষক নিযুক্তিত অনিয়মৰ অভিযোগ লাভ কৰাৰ পিছত পাটনা উচ্চ ন্যায়ালয়ে সমগ্ৰ বিষয়টোৰ তদন্ত কৰিবলৈ ভিজিলেন্স ইনভেষ্টিগেচন ব্যুৰোক নিৰ্দেশ দিছিল। ইয়াৰ পিছতে ৰাজ্যখনৰ সকলো জিলাতে নিযুক্ত শিক্ষকসকলৰ শিক্ষাগত অৰ্হতাৰ প্ৰমাণপত্ৰ আৰু নিযুক্তি পত্ৰ পৰীক্ষা কৰাৰ প্ৰক্ৰিয়া আৰম্ভ হয়। তদন্ত সমাপ্ত হোৱাৰ পিছত ভিজিলেন্স ব্যুৰোৱে শিক্ষা বিভাগক বিহিত ব্যৱস্থা গ্ৰহণৰ বাবে শিক্ষকসকলৰ এখন তালিকা জমা দিয়ে। বিভাগটোৰ তথ্য অনুসৰি, তদন্তত ভুৱা প্ৰমাণপত্ৰ আৰু জাল নথিপত্ৰৰ ভিত্তিত চাকৰি লাভ কৰা বহু ঘটনা ধৰা পৰিছে। এই ঘটনাৰ পৰিপ্ৰেক্ষিতত ৰাজ্যৰ মুখ্যমন্ত্ৰী সম্ৰাট চৌধুৰীয়ে সকলো জিলাতে ভিজিলেন্স আৰক্ষী থানা স্থাপন কৰাৰ কথাও ঘোষণা কৰিছে।
শিক্ষা বিভাগৰ তৰফৰ পৰা লোৱা সিদ্ধান্ত অনুসৰি, অভিযুক্ত শিক্ষকসকলে এতিয়ালৈকে লাভ কৰা সকলো দৰমহা ঘূৰাই দিব লাগিব আৰু ইয়াৰ সৈতে সুতো আদায় দিব লাগিব। আনুষ্ঠানিকভাৱে বৰখাস্ত কৰাৰ প্ৰক্ৰিয়া সম্পন্ন হোৱাৰ পিছতেই এই ধন ঘূৰাই লোৱাৰ কাৰ্যসূচী আৰম্ভ হ’ব। ৰাজ্যখনৰ নিযুক্তি ব্যৱস্থাটো সম্পূৰ্ণ স্বচ্ছ কৰি ৰাখিবলৈ আৰু কেৱল প্ৰকৃত অৰ্হতাসম্পন্ন শিক্ষকসকলেহে যাতে শ্ৰেণীকোঠাত পাঠদান কৰিব পাৰে, তাক নিশ্চিত কৰাৰ বাবেই এই কঠোৰ পদক্ষেপ লোৱা হৈছে। ইতিমধ্যে কিছুসংখ্যক শিক্ষকে নিজে পদত্যাগ কৰা বুলিও জানিব পৰা গৈছে।
বিহাৰত শিক্ষা খণ্ডৰ দুৰ্নীতিৰ ইতিহাসত ইয়াক অন্যতম ডাঙৰ পদক্ষেপ হিচাপে গণ্য কৰা হৈছে। কিন্তু ইয়াৰ বাবে এতিয়া বহু প্ৰশ্নৰো সৃষ্টি হৈছে। ২০০৬ চনৰ পৰা ২০১৫ চনৰ ভিতৰত হোৱা নিযুক্তিৰ অনিয়ম যদি এতিয়াহে তদন্ত কৰা হৈছে, তেন্তে ইমান দিনে এই বিষয়টো কিয় পোহৰলৈ অহা নাছিল বুলি প্ৰশ্ন উঠিছে। নিযুক্তিৰ সময়তে প্ৰাৰ্থীসকলৰ নথিপত্ৰ কিয় ভালদৰে পৰীক্ষা কৰা হোৱা নাছিল আৰু এই দীৰ্ঘদিনীয়া পলম তথা ক্ৰুটিৰ বাবে প্ৰকৃততে কোন দায়ী, এতিয়া তাৰেই উত্তৰ বিচাৰি থকা হৈছে।
উল্লেখ্য কৰিব পাৰি যে ইয়াৰ পূৰ্বে ২০২১ চনৰ পৰা পশ্চিমবঙ্গতো শিক্ষক নিযুক্তিৰ ব্যাপক দুৰ্নীতিৰ অভিযোগ উত্থাপন হৈছিল। বৃহৎ পৰিমাণৰ ধনৰ বিনিময়ত অযোগ্য প্ৰাৰ্থীক চাকৰি বিক্ৰী কৰাৰ অভিযোগত বহু ৰাজনৈতিক নেতা আৰু মন্ত্ৰী জে‘ললৈ যাবলগীয়া হৈছিল। উচ্চতম ন্যায়ালয়ৰ নিৰ্দেশত শেষত ২০১৬ চনৰ এছএছচিৰ পেনেলত থকা ২৫,৭৫২ গৰাকী শিক্ষক আৰু কৰ্মচাৰীৰ চাকৰি বাতিল হৈছিল। এতিয়া বিহাৰৰ এই ঘটনাই ৰাজ্যখনৰ দুৰ্নীতিৰ শিপা কিমান দূৰলৈ বিয়পি আছে, সেয়া লক্ষণীয় হ’ব।
