‘কেব’ৰ বিৰুদ্ধে আজি সন্ধিয়া শিৱসাগৰৰ ৰাজপথত তীব্ৰ প্ৰতিবাদ সাব্যস্ত কৰে শিৱসাগৰবাসীয়ে। শিৱসাগৰ আঞ্চলিক ছাত্ৰ সন্থাৰ আহ্বানত আজি শিৱসাগৰৰ জেষ্ঠ্য নাগৰিক, ব্যৱসায়ী সন্থা, শিৱসাগৰ প্ৰেছ ক্লাৱ, মহিলা মঞ্চ, বিভিন্ন দল-সংগঠনৰ লগতে সাধাৰণ নাগৰিকেও অংশ গ্ৰহণ কৰে এই প্ৰতিবাদী সমদলত।
সদৌ শিৱসাগৰ ছাত্ৰ সন্থাৰ কাৰ্যালয়ৰ সন্মুখৰ পৰা শিৱসাগৰ চহৰৰ মাজেদি এক প্ৰতিবাদী জোঁৰ সমদল বাহিৰ কৰি মুক্তিনাথ চাৰিআলিত এখন প্ৰতিবাদী সভা অনুষ্ঠিত কৰে।
আছু নেতা দীপাংকৰ শইকীয়াই আঁত ধৰা উক্ত প্ৰতিবাদী সভাত শিৱসাগৰৰ জ্যেষ্ঠ নাগৰিক সোণাৰাম বৰুৱা, অনিল দত্ত, শিৱসাগৰ প্ৰেছ ক্লাৱৰ সভাপতি ইনামূল হাজৰিকা, ব্যৱসায়ী সন্থাৰ সভাপতি বকুল বৰঠাকুৰ, জাতীয়তাবাদী যুৱ ছাত্ৰ পৰিষদৰ নেতা দিব্যজ্যোতি দত্তৰ লগতে বহু ব্যক্তিয়ে ‘কেব’ বিৰোধী মন্তব্য আগবঢ়ায়।
শিৱসাগৰৰ জ্যেষ্ঠ সাংবাদিক ভৈৰৱ মুণ্ডাই কয়, কেন্দ্ৰ আৰু ৰাজ্য চৰকাৰে অসমত ‘কেব’ জাপি দি অসমীয়া ভাষা সংস্কৃতি বিপদত পেলাবলৈ আগবাঢ়িছে। সেইবাবে ‘কেব’ৰ বিৰুদ্ধে সকলো জাতি জনগোষ্ঠী ধৰ্ম নিৰ্বিশেষে ওলাই আহিব লাগে। লগতে ভাষা থাকিলেহে অসমীয়া জাতি থাকিব বুলিও মুণ্ডাই মন্তব্য কৰে।
আনহাতে জাতিৰ এই সংকটকালত শিৱসাগৰৰ ৰাজপথলৈ ওলাই আহিল বিশেষভাৱে সক্ষম শিল্পী হেম শইকীয়া। প্ৰতিবাদী মিচিল লৈ সুধাকণ্ঠৰ গীত গাই উৎসাহিত কৰে প্ৰতিবাদী জনতাক।
ইফালে আছুৰ নেতৃত্বই একালৰ সতীৰ্থৰ বিৰুদ্ধে গৰজি উঠিল শিৱসাগৰৰ ৰাজপথত। “জাতি আজি ৰাজপথত সৰ্বা তোমাৰ লাজ নাই, জাতি আজি সংকটত তপন তুমি মাত দিয়া, জাতি আজি উচন হ’ল বাংলাদেশী আপোন হ’ল, কেব আমি নামানো, বিজেপি গ’ বেক, হিমন্ত বিশ্ব শৰ্মা মুৰ্দাবাদ” আদি শ্ল’গানেৰে শিৱসাগৰৰ ৰাজপথ উত্তাল কৰি তোলে।