অসমত ককৰোচ জনতা পাৰ্টীৰ শেহতীয়া কাৰ্যকলাপক লৈ প্ৰশ্ন উত্থাপন কৰিছে সদৌ অসম ছাত্ৰ সন্থাই। সংগঠনটোৱে ৰাজ্যখনৰ চৰকাৰী বিদ্যালয়সমূহৰ আন্তঃগাঁথনি আৰু সা-সুবিধাৰ বুজ ল’বলৈ আৰম্ভ কৰা ‘স্কুল ঠিক কৰো’ অভিযানৰ আঁৰত ৰাজনৈতিক অভিসন্ধি আছে বুলি অভিযোগ তুলি দেওবাৰে আছুৱে তীব্ৰ প্ৰতিক্ৰিয়া প্ৰকাশ কৰিছে। আছুৰ সাধাৰণ সম্পাদক সমীৰণ ফুকনে এই সমগ্ৰ প্ৰক্ৰিয়াটোক অসমৰ পৰিৱেশ অস্থিৰ কৰি ৰখাৰ এক ৰাজনৈতিক কাৰ্যসূচী বুলি অভিহিত কৰিছে।
চিজেপিৰ বিদ্যালয় পৰিদৰ্শন কাৰ্যসূচী সন্দৰ্ভত প্ৰতিক্ৰিয়া প্ৰকাশ কৰি সমীৰণ ফুকনে কয় যে এনে পদক্ষেপে ৰাজ্যখনত এক অস্থিৰ পৰিৱেশৰ সৃষ্টি কৰিছে। তেওঁ অভিযোগ কৰে যে বহিঃৰাজ্যৰ একাংশ লোকে জেহাদী নেটৱৰ্ক ব্যৱহাৰ কৰি অসমত ড্ৰাগছৰ প্ৰচলন বৃদ্ধি কৰি থকাৰ সময়তে ৰাজ্যখনৰ শান্তি-শৃংখলা বিঘ্নিত কৰাৰ এক প্ৰয়াস চলিছে নেকি, সেয়া এক ডাঙৰ প্ৰশ্ন। অৱশ্যে, ৰাজনৈতিক উদ্দেশ্য পৰিহাৰ কৰি অসমৰ উন্নয়নমূলক কাম-কাজত জড়িত হ’ব বিচৰা যিকোনো ব্যক্তি বা সংগঠনক আছুৱে আদৰণি জনাব বুলিও তেওঁ স্পষ্ট কৰি দিয়ে। ফুকনে লগতে কয় যে চিজেপিৰ এই কাৰ্যসূচীসমূহৰ ৰাজনৈতিক স্বৰূপ সম্পৰ্কে ৰাইজ অৱগত। অসমৰ জনসাধাৰণৰ স্বাৰ্থত আছুৱে ধাৰাবাহিকভাৱে কাম কৰি যাব বুলি উল্লেখ কৰি তেওঁ অসমক অস্থিৰ আৰু বিশৃংখল কৰি ৰাখিব বিচৰা শক্তিসমূহক চিনাক্ত কৰিবলৈ সকলোকে আহ্বান জনায়।
উল্লেখ্য যে, শেহতীয়াকৈ চিজেপিয়ে অসমত তেওঁলোকৰ ‘স্কুল ঠিক কৰো’ অভিযান আৰম্ভ কৰিছে। এই কাৰ্যসূচীৰ অংশ হিচাপে সংগঠনটোৰ সহ-আহ্বায়ক আশুতোষ ৰাংকাৰ নেতৃত্বত এটা দলে ইতিমধ্যে পলাশবাৰী আৰু দিছপুৰ সমষ্টিৰ কেইবাখনো চৰকাৰী বিদ্যালয় পৰিদৰ্শন কৰি ছাত্ৰ-ছাত্ৰী, শিক্ষক আৰু বিদ্যালয় কৰ্তৃপক্ষই সন্মুখীন হোৱা সমস্যাসমূহৰ বুজ লৈছে। চিজেপিৰ তৰফৰ পৰা জনোৱা অনুসৰি, অসম আৰু উত্তৰ-পূৰ্বাঞ্চলৰ অন্যান্য প্ৰান্ততো তেওঁলোকৰ এই বিদ্যালয় পৰিদৰ্শন কাৰ্যসূচী অব্যাহত থাকিব।
ইয়াৰ পূৰ্বে যোৱা ২৭ ছেপ্টেম্বৰত গুৱাহাটীত চিজেপিয়ে আঞ্চলিক স্বেচ্ছাসেৱকসকলৰ এখন সভাৰ আয়োজন কৰিছিল যদিও ৰাজ্যিক সচিবালয়ৰ সমীপত এই সভা অনুষ্ঠিত কৰাৰ অনুমতি নথকাৰ বাবে অসম আৰক্ষীয়ে সংগঠনটোৰ কেইবাগৰাকীও সদস্যক আটক কৰিছিল। ৰাংকাকে ধৰি চিজেপিৰ প্ৰায় ৩৫ গৰাকী জ্যেষ্ঠ নেতা আৰু সদস্যক আটক কৰি কাহিলীপাৰাস্থিত দশম অসম আৰক্ষী বাহিনীৰ ছাউনীত ৰখা হৈছিল। আটক হোৱাৰ প্ৰতিবাদত সদস্যসকলে অনশন কাৰ্যসূচী ৰূপায়ণ কৰিছিল আৰু পৰৱৰ্তী সময়ত সেইদিনা নিশাই আৰক্ষীয়ে তেওঁলোকক মুকলি কৰি দিছিল।
