বাংলাদেশ আৰু ভাৰত চৰকাৰৰ মাজত অবৈধ বিদেশী বহিষ্কাৰৰ বাবে দ্বিপাক্ষিক চুক্তি সম্পাদন কৰাৰ দাবী তুলিছে আছুৱে। বৃহস্পতিবাৰে উচ্চতম ন্যায়ালয়ত বিদেশী সংক্ৰান্তীয় গোচৰৰ শুনানিত উপস্থিত থকা আছুৰ মুখ্য উপদেষ্টা ড০সমুজ্জ্বল কুমাৰ ভট্টাচাৰ্যই এই দাবী উত্থাপন কৰিছে।
অসম চুক্তিৰ আধাৰত অবৈধ বিদেশীক বহিষ্কাৰ কৰাৰ দাবী দোহাৰি ড০ ভট্টাচাৰ্যই কয়,’’অসম চুক্তিৰ আধাৰত চিনাক্ত হোৱা অবৈধ বিদেশীক বহিষ্কাৰ কৰক। ভাৰত আৰু বাংলাদেশ চৰকাৰৰ মাজত উচ্চস্তৰৰ কূটনৈতিক আলোচনা অনুষ্ঠিত কৰক। অবৈধ বাংলাদেশী বহিষ্কাৰৰ বাবে শীঘ্ৰেই দুয়োখন দেশৰ মাজত দ্বিপাক্ষিক চুক্তি সম্পাদনৰ বাবে খৰতকীয়া ব্যৱস্থা গ্ৰহণ কৰক।‘’
ভট্টাচাৰ্যই কয়,’’ অসম চুক্তি অনুসৰি ১৯৭১ চনৰ আগেয়ে অহা হিন্দু-মুছলমান সকলো নাগৰিকে অসমত থাকিব পাৰিব। ৭১’ৰ পাছত অহা হিন্দু-মুছলমান সকলো অবৈধ বাংলাদেশী নাগৰিকৰ বহিষ্কাৰ হ’ব লাগিব।‘’
তেওঁ লগতে কয় যে চুক্তি অনুসৰি চিনাক্ত হোৱাৰ পাছত হেৰাই যোৱা বিদেশীক ৰাজ্য চৰকাৰে কৰায়ত্ত কৰক আৰু উভয় চৰকাৰে বহিষ্কাৰৰ ব্যৱস্থা গ্ৰহণ কৰক। চুক্তি অনুসৰি বিদেশী চিনাক্ত হৈ ডিটেনশ্যন কেম্পত থকা অবৈধ বিদেশীক বহিষ্কাৰৰ বাবে উভয় চৰকাৰে ব্যৱস্থা লওক।
আনহাতে, ডিটেনশ্যন কেম্পত থকা অবৈধ বাংলাদেশীক চৰ্তসাপেক্ষে মুকলি কৰি দিলে ই ভুল ইংগিত বহন কৰিব বুলি উল্লেখ কৰি ভট্টাচাৰ্যই কয় যে ই অবৈধ অনুপ্ৰৱেশক উদ্গনি যোগাব।
অসম চুক্তি মৰ্মে সকলো অবৈধ বাংলাদেশী নাগৰিকক বহিষ্কাৰৰ ব্যৱস্থা গ্ৰহণ কৰিবলৈ কেন্দ্ৰ আৰু ৰাজ্য উভয় চৰকাৰৰ প্ৰতি আছুৰ উপদেষ্টাগৰাকীয়ে আহ্বান জনায়।
