সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক সদস্য উপম দাসক যোৱা নিশা ছয়গাঁও আৰক্ষীয়ে গ্ৰেপ্তাৰ কৰিছে। পলাশবাৰীৰ শিকাৰহাটিৰ জেঠায়েকৰ ঘৰত আত্মগোপন কৰি থকা অৱস্থাত আৰক্ষীয়ে তেওঁক কৰায়ত্ত কৰে।
শেহতীয়াকৈ বাংকাকাটাত কৰৱী কাকতি নামৰ এগৰাকী যুৱতীৰ আত্মহত্যাৰ ঘটনাই তীব্ৰ চাঞ্চল্যৰ সৃষ্টি কৰিছিল।
এই আত্মহত্যাৰ ঘটনাৰ সৈতে উপম দাসৰ নাম সাঙোৰ খাই পৰিছে। কৰৱীৰ পৰিয়ালে অভিযোগ উত্থাপন কৰিছে যে উপম দাসৰ প্ৰেমৰ প্ৰতাৰণা আৰু মানসিক নিৰ্যাতনৰ বাবেই যুৱতীগৰাকীয়ে চৰম সিদ্ধান্ত ল’বলৈ বাধ্য হ’ল।
পৰিয়ালৰ লোকৰ মতে, ২০১৬ চনতে আছু নেতা উপম দাসৰ সৈতে কৰৱীৰ আইনী বিবাহ সম্পন্ন হৈছিল।
দীৰ্ঘদিন ধৰি উপম দাসে কৰৱীক মানসিকভাৱে হাৰাশাস্তি কৰি অহাৰ অভিযোগ উত্থাপন কৰিছে ভুক্তভোগী পৰিয়ালটোৱে।
প্ৰেম আৰু বিবাহৰ সম্পৰ্ক থকাৰ পাছতো উপমে কৰৱীক প্ৰতাৰণা কৰা বুলি তেওঁলোকে এজাহাৰত উল্লেখ কৰিছে।
এই গুৰুতৰ অভিযোগ উত্থাপন হোৱাৰ পিছতে সদৌ অসম ছাত্ৰ সন্থাই কঠোৰ পদক্ষেপ গ্ৰহণ কৰিছে। সংগঠনটোৰ মৰ্যাদা আৰু অনুশাসন ভংগ কৰাৰ পৰিপ্ৰেক্ষিতত শুকুৰবাৰে উপম দাসক আছুৰ পৰা বহিষ্কাৰ কৰা হয়।
বৰ্তমান ছয়গাঁও আৰক্ষীয়ে উপম দাসক জেৰা চলাই আছে। আত্মহত্যাত উদগনি দিয়াৰ গোচৰত তেওঁৰ বিৰুদ্ধে তদন্ত প্ৰক্ৰিয়া আগবাঢ়িছে। আৰক্ষীয়ে ঘটনা সন্দৰ্ভত অধিক তথ্য সংগ্ৰহৰ বাবে কৰৱীৰ ফোন কল ডিটেইলছ আৰু অন্যান্য প্ৰমাণসমূহ পৰীক্ষা কৰি আছে।
